DILI, 20 setembru 2021 (TATOLI)-Ministru Administrasaun Estatál (MAE) Miguel Pereira de Carvalho, segunda ne’e fó ona pose ba Prezidente Autoridade Munisípiu Dili,Guilhermina Filomena Saldanha hodi troka Prezidente sesante, Gaspar Soares ba periodu tinan lima hahú 2021 to’o 2026.
Prezidente Autoridade Munisípiu Dili ne’e iha ninia juramente promete sei obedese ba Konstituisaun RDTL no leal ba nasaun hodi serbí povu ho nasaun durante ninia mandatu ho responsabilidade.
Notísia Relevante:Kandidatu PA Dili, Guilhermina hetan valor di’ak liu
“Ha’u jura sei obedese tuir regulamentu ne’ebé iha no sei hala’o funsaun ne’ebé fó ona mai ha’u no sei tau interese nasaun nian aas liu, no ha’u jura sei servisu di’ak ba públiku serbí komunidade, povu ho onestidade, profisionál no responsabilidade ba interese nasaun nian,” dehan emposada ne’e iha salaun administrasaun munisípiu Dili, ohin.
Iha biban hanesan Ministru Administrasaun Estatál, Miguel Pereira de Carvalho husu ba prezidente autoridade foun ne’e tenke servisu ho responsabilidade liliu atu mantein kooperasaun ho parte hotu-hotu hodi kontribui ba dezenvolvimentu iha kapitál nasaun Dili.
Entretantu, rezultadu teste eskrita iha fulan hirak liubá, Guilhermina Filomena Saldanha, hetan valór di’ak liu (13.6) tanba resposta loos ba pergunta hamutuk 68.
Enkuantu, kandidatu sira seluk, kompostu hosi Abílio Mesquita “Mausoko”, António Moniz Calau hetan valór hanesan 13.2 no lvete de Fátima Sarmento de Oliveira, fó resposta loos ba pergunta hamutuk 66.
Nune’e, kandidatu Sabino da Costa hetan valór 11.8 tanba fó resposta loos ba pergunta hamutuk 59 no kandidatu Manuel da Silva hetan valór 10 tanba fó resposta loos ba pergunta 50.
Notísia Relevante:MAE submete ona lista kandidatu PAM-Administradór foun ba KM
Jornalista : Arminda Fonseca
Editór: Agapito dos Santos
