DILI, 20 setembru (TATOLI)—Polísia Nasionál Timor-Leste (PNTL), liu hosi Unidade Tránzitu, munisípiu Dili, detein joven mane ida ho inisiál J, tanba kondúz motorizada laiha karta kondusaun, la uza kapasete no la koopera ho autoridade seguransa.
Joven ne’e hetan detensaun iha 18 setembru, bainhira Polísia Tránzitu hala’o pasa revista iha área Faról, Dili.
Notísia relevante:Polísia Tránzitu halo apreensaun ba motór-karreta 69
“Sidadaun ne’e laiha karta kondusaun no agora ita detein hela iha sela,” Komandante Tránzitu munisípiu Dili, Inspetór Domingos Gama, hateten ba jornalista-sira iha kna’ar fatin, Caicoli, segunda ne’e.
Daudaun ne’e, suspeitu kumpre hela sela durante oras 72 sei aprezenta ba Ministériu Públiku (MP), hodi submete ba primeiru interrogatóriu iha Tribunál.
Tuir artigu 207, kona-bá kondusaun sem karta ba ema ne’ebé kondúz veíkulu, maske laiha lisensa ne’ebé lei ezije, sei hetan pena prizaun to’o tinan rua ka multa.
Jornalista: Nelson de Sousa
Editór: Cipriano Colo
