COVALIMA, 20 setembru 2021 (TATOLI)-Servisu Munisipál Jestaun Merkadu no Turizmu munisípiu Covalima, oras ne’e hasai ona sirkulár ho númeru 03/SMGMT/AMC/ I/ 2021 aplika multa $ 25 to’o $ 50 ba negosiante sira ne’e soe lixu arbiru.
Diretór Servisu Munisipál Jestaun Merkadu no Turizmu, Damião Amaral, hateten sirkulár ne’e hasai hodi regula negosiante sira iha merkadu Covalima bainhira deskobre soe lixu arbiru.
Damião Amaral hato’o kestaun ne’e hafoin sensbiliza sirkulár ne’e ba negosiante sira iha Salaun Administrasaun Munisípiu Covalima, segunda ne’e.
Sirkulár ne’e hateten bainhira identifika negosiante sira iha merkadu Debos no Camanasa soe lixu arbiru sei selu koima $ 50 no ba sira ne’ebé la ense lixu iha plástiku antes lori bá soe iha fatin lixeira sei aplika multa $ 25.
Bazeia ba orariu ne’ebé estabelesidu husi Komite jestaun merkadu katak atividade rekoilla lixu fahe ba parte dader no lokraik, iha dader tuku 06:00 to’o 07:00 no lokraik iha tuku 18:00 to’o ramata.
“Ita atu haree progresu servisu hosi komite jestaun merkadu ne’ebé durante ne’e hala’o kona-bá jestaun lixu. ha’u hasai ona sirkulr ba ita-nia vendedòr sira, ohin ami sei halo debate kona-bá sirkulár hodi hamenus problema lixu iha markadu,”nia hateten.
Diretór ne’e esplika nia parte hasai sirkulár ne’e bazeia ba rezultadu enkontru ne’ebé realiza antes ne’e ho autoridade lokál, no sira konkorda atu implementa sirkulár ne’e hodi garante munisípiu Covalima livre husi lixu.
Tuir observasaun nota merkadu rua ne’e kontribui lixu ho kuantidade boot tanba ne’e ho sirkulár ne’e, sei tulun ekipa jestaun merkadu atu rekoilla lixu ho diak liutá.
Iha fatin hanesan Sekretáriu Munisipál Covalima, Afonso Nugueira Nahak hateten durante implementasaun Estadu Emerjénsia liga ho COVID-19 iha Timor-Leste nota negosiante sira soe foer arbiru hodi afeta ba saúde públika.
“Ohin ita mai iha ne’e atu halo jestaun ba merkadu Debos ho Camanasa iha munisípiu Covalima ho di’ak negosiante sira soe lixu arbiru iha merkadu ,”Afonso hateten.
Jornalista:Celestina Teles
Editór :Agapito dos Santos
