DILI, 20 setembru 2021 (TATOLI)–Diretór Jerál Sekretaria Estadu Formasaun Profisionál no Empregu (SEFOPE), Paulo Alves, informa, joven ne’ebé selesionadu hosi sistema random Governu koreanu, sei desloka ba Koreia Súl iha loron 21 outobru tinan ne’e.
“Tanba ne’e, ohin ami bolu kandidatu traballadór na’in-71 ne’ebé atu bá, haruka sira mai hodi informa kona-ba kestaun viajen no kritériu sira molok sira aranka,” Diretór Jerál hateten hafoin ramata enkotru ho traballadór, iha Diresaun Nasionál Empregu Exteriór, SENAE Becora, segunda ne’e.
Notísia relevante: Kandidatu traballadór na’in-500 ezije SEFOPE buka dalan transporta bá Koreia
Rekezitu viajen ba Koreia ne’ebé kandidatu traballadór tenke kumpre, diferente ho tinan antes ne’e.
“Kustu viajen ne’ebé sira prepara antes ne’e ba ema ida hamutuk $2.000, maibé daudaun ne’e atu halo viajen ba Koreia ho kustu hamutuk $4.200. Kritériu daudaun ne’e rigor tebes no Governu Timor-Leste tenke kumpre, se lae traballadór labele desloka,” nia akresenta.
Iha mós kritériu hosi Governu koreanu, ne’ebé bainhira traballadór ida atu ba serbisu, molok desloka tenke kumpre kuarentena durante loron 14 no traballadór ne’e rasik mak selu.
“Tanba ne’e, ohin ami esplika kritériu sira ne’e ba ita-nia traballadór sira atu komprende, sira hakarak ou lae, tanba kritériu daudaun ne’e todan, la’ós hanesan uluk,” Paulo Alves hatutan.
Molok atu desloka ba Koreia, tenke kumpre kuarentena, ne’ebé ba ema ida selu $50 kada loron, ba loron 14, hafoin to’o iha Koreia bainhira deteta pozitivu COVID-19, tenke kumpre tan izolamentu loron 14 ho kustu $1.500.
“Ita-nia traballadór sira molok atu bá, tenke tama kuarentena iha ne’e loron 14, fatin SEFOPE prepara hotu ona, kuandu ida ne’ebé maka negativu hosi kuarentena ne’e, ami sei prepara karreta atu sira bá liu aeroportu no desloka,” Diretór ne’e esplika.
Jornalista : Natalino Costa
Editora : Julia Chatarina
