VIQUEQUE, 20 setembru 2021 (TATOLI)—Hahú hosi 2012 to’o 2021, Serbisu Saúde Munisípiu Viqueque, rejista pasiente ne’ebé sofre moras Acquired Immune Deficiency Syndrome- Human Immunodeficiency Virus (HIV-SIDA), hamutuk na’in 12, númeru ne’e iha na’in-rua mak mate.
“Ita rejista kazu HIV-SIDA na’in 12, no na’in-rua mak mate ona, na’in-ida deteta pozitivu maibé halai lakon tiha no agora daudaun sei ativa na’in-sia,” Diretór Serbisu Saúde Munisípiu Viqueque, Francisco de Carvalho, hateten ba jornalista iha kanar fatin, Boromatan, segunda ne’e.
Notísia relevante:2003-2021 HIV-SIDA hamate ema 155
Bazeia ba númeru rejistadu ne’e maka, parte serbisu saúde Viqueque hamutuk ho Komisaun Nasionál Kombate HIV-SIDA, realiza formasaun ba xefe postu saúde lima no pesoál saúde-sira hodi hasa’e koñesimementu ba halo tratamentu pasiénte HIV-SIDA bainhira númeru kazu aumenta.
HIV-SIDA da’et ba ema seluk liuhosi daun ne’ebé utiliza hodi halo tato ema-nia isin, halo relasaun seksuál livre.
Parte serbisu saúde apela nafatin ba pasiénte HIV-SIDA no família tenke koopera ho pesoál saúde tanba agora daudaun pesoál saúde prontu atu fó konsellu hodi hetan tratamentu.
Jornalista: Vitorino Lopes da Costa
Editór: Cipriano Colo
