DILI, 21 setembru 2021 (TATOLI)–Bankada parlamentár kompostu hosi CNRT, FRETILIN no PD kestiona ho transformasaun Servisu Água no Saneamentu (SAS) ba Bee Timor-Leste, Empreza Públika (BTL,E.P) tanba funsionáriu balun lakon serbisu.
Deputada Bankada CNRT, Virgínia Ana Belo, hateten funsionáriu barak mak sofre no lakon servisu bainhira SAS nakfilak ka transforna ba Bee Timor-Leste, Empreza Públiku.
Notísia Relevante :Polémika funsionáriu 196, Prezidente BTL, E.P prontu hatan iha PN
“Funsionáriu barak mak sofre konsekuénsia lubuk ida. Fnsionáriu balun serbisu ona durante tinan 10 laiha rekuñesimentu no balun agora la serbisu. Funsionáriu hirak-ne’ebé hetan tiha kontratu iha Governu anteriór, Governu ida-ne’e muda tiha SAS ba Bee Timor-Leste, sira la hetan ona sira-nia direitu no balun la serbisu to’o agora,” Virgínia Ana Belo levanta liuhosi plenária, tersa ne’e.
Funsionáriu hirak-ne’ebé lakon serbisu ne’e husu ba Komisaun E iha Parlamentu Nasionál atu bele fiskaliza, nune’e haree sira-nia kondisaun iha Bee Timor-Leste nian.
Deputadu Bankada FRETILIN, David Dias Ximenes ‘Mandati’, lamenta ho situasaun ne’e tanba kuandu transforma ba empreza públika atu serbi públiku ho di’akliu la’ós haboot estrutura iha leten no halo kiik fali estrutura iha kraik.
“Loos, ema funsionáriu antigun sira-ne’e, sira duni sai hotu ona. Agora ema operasionál sira uluk ne’e mak serbisu ba empreza públika nia dirasaun. Kuandu ita halo jestaun ba estrutura ida, la’ós hanesan piramida (triangle) katak estrutura hosi leten mak boot-liu, kraik ne’e kiik fali. Hanesan ema haan boot, kabun tasak no ain lotuk,” Deputadu Mandati kestiona.
Deputada Bankada Partidu Demokrátiku (PD), Elvina Carvalho de Sousa, husu ba Komisaun E ne’ebé trata asuntu Infraestrutura atu akompaña no fiskaliza problema ne’ebé akontese iha BTL ne’e.
“Prosesu rekrutamentu ba funsionáriu SAS ne’ebé transforma fali BTL,E.P, tanba tuir informasaun ne’ebé ha’u rona katak sira sente iha diskriminasaun ho rekrutamentu ida-ne’e. Sira hala’o serbisu durante tinan barak ho serbisu ne’ebé todan, maibé to’o ikus mosu BTL,E.P ne’e diskrimina tiha sira iha prosesu tomak,” nia lamenta.
Nia dehan, funsionáriu foun ne’ebé foin tama ho saláriu ne’ebé boot-liu fali funsionáriu antigu sira, entaun oinsá mak bele kria ambiente di’ak iha serbisu fatin.
“Funsionáriu antigu simu saláriu kiik maibé funsionáriu foun simu saláriu bootliu, ne’e diskriminasaun,” nia dehan.
Notísia Relevante :MOP-BTL no KFP buka solusaun ba polémika funsionáriu 196
Jornalista : Evaristo Soares Martins
Editór : Cancio Ximenes
