DILI, 21 setembru 2021 (TATOLI)-–Institutu Petróleu no Jeolojia (IPG, sigla Portugés) planeia atu halo estudu identifikasaun ba perfurasaun bee-moos hodi fornese ba abitante iha aldeia Manuleu, suku Benunuc, postu administrativu Metinaro, munisípiu Dili.
Ministru Petróleu no Minerál, Víctor da Conceição Soares, hateten, IPG la’ós halo de’it estudu mina no gás, maibé halo mós estudu identifkasaun bee-moos iha rai-okos.
“Ha’u hanoin ba oin IPG bele konsidera halo estudu identifikasaun bee iha rai-okos no perfurasaun hodi fornese ba komunidade sira iha Manuleu, tanba ita haree área ne’e bee-moos susar tebes,” Ministru Víctor hateten iha ámbitu sosializasaun ba programa identifikasaun rai no propriedade ba projetu armazenamentu kombustível iha Manuleu, Metinaro, tersa ne’e.
IPG iha ona esperiénsia ba estudu identifikasaun bee-moos iha rai-okos iha Cribas, Manatuto no Suai, ne’ebé kuaze benefisia ona populasaun 3.000.
Notísia relevante: Populasaun 2.800 iha Cribas asesu ona bee-moos
Iha biban hanesan, Prezidente IPG, Gabriel Gaspar Aparício de Oliveira, hateten, nia parte simu ona proposta hosi Autoridade lokál Metinaro atu halo estudu aquíferu hodi identifika prezervasaun bee iha rai-okos.
“Ita-nia rai ne’e kuandu tempu udan bee barak, maibé tempu bai-loron bee maran hotu, ne’ebé ita presiza halo estudu hodi identifika no halo perfurasaun ba bee atu benefisia populasaun,” nia akresenta.
Nune’e, IPG kompromete sei halo identifikasaun iha área potensiál bee-moos to’o faze perfurasaun.
IPG iha knaar atu halo identifikasaun área potensiál bee-moos to’o faze perfurasaun, enkunatu kona-ba distribuisaun bee kabe ba kompeténsia Bee Timor-Leste, Empreza Públika (BTL, E.P).
Aleinde ne’e, institutu ne’e kontinua aposta servisu no funsaun ne’ebé foku ba rekursu petróleu no gás, estudu ba riku jeolojia no mapa subtitividade no kompila dadus.
Jornalista : Florêncio Miranda Ximenes
Editora : Julia Chatarina
