DILI, 22 setembru 2021 (TATOLI)–Iha inísiu fulan-setembru 2021, taxa mortalidade iha postu administrativu Quelicai, munisípiu Baucau hamutuk 54, ne’ebé maioria mai hosi komunidade idozu hosi suku hamutuk 15.
Tanba ne’e, Sala Situasaun, Sentru Integradu Jestaun Krize (CIGC, sigla portugés) husu ba Governu atu aselera vasinasaun iha rejiaun ne’e, nune’e bele proteje komunidade hosi vírus.
“Proposta ne’ebé mak CIGC no Ministériu Saúde fó, maka halo vijilánsia ba moras ne’e nia da’et maibé seidauk rekomenda atu aplika konfinamentu obrigatóriu iha Quelicai. Ho nune’e, sira-nia rekomendasaun atu hakotu serka sanitária iha Baucau maibé sira husu atu aselera lalais númeru vasinasaun iha Baucau, liuliu postu Quelicai,” Ministru Prezidénsia Konsellu Ministru, Fidelis Manuel Leite Magalhães, relata, hafoin reuniaun ezekutivu, iha Palásiu Governu, kuarta ne’e.
Notísia relevante: Ekipa konjunta hahú investiga kauza óbitu na’in-54 iha Quelicai
Tuir Portavóz Governu, ezekutivu sira akompaña hotu evoluasaun no situasaun iha Quelicai, ne’ebé iha unidade vijilánsia epideomolojika hodi halo serbisu.
“Tuir informasaun ne’ebé relata hosi sira katak iha ema 54 ne’ebé maka mate, maibé kauza hosi mate sei iha hela investigasaun. Semana oin maka relata informasaun kompleta,” nia akresenta.
Enkuantu, tuir dadus ne’ebé relata hosi CIGC iha loron tersa (21/09), iha munisípiu Baucau kazu detatu foun hamutuk 10, nune’e totál kazu ativu hamutuk 114.
Vasina ne’ebé fó ona ba sidadaun elijível (tinan 18 ba leten) iha Baucau to’o tersa ne’e, ba doze dahuluk atinje 53,2% no doze daruak 25,6%.
Jornalista : Antónia Gusmão
Editora : Julia Chatarina
