DILI, 22 setembru 2021 (TATOLI)-–Eletricidade de Timor-Leste, Empreza Públika (EDTL,E.P) daudaun ne’e tun hela ba terrenu hodi halo levantamentu no verifikasaun fatin risku, hodi harii torre eletrisidade iha fatin permanente.
“Ekipa téknika sira presiza ba terrenu hodi verifika torre iha fatin risku atubele halo dezeñu tuir estratejia, nune’e bele halo konstrusaun permanente, liuliu haree nesesáriu hodi halo morru protesaun ou halo mudansa ba posizaun torre sira,” Prezidente Konsellu Administrasaun EDTL, E.P, Paulo da Silva, hateten ba Agência TATOLI, iha ninia knaar fatin, Caicoli, kuarta ne’e.
Inundasaun ne’ebé akontese iha loron 04 abríl konsege estraga torre transmisaun liña eletrisidade.
“Torre 16 mak hetan estragu, maibé tékniku sira atu halo levantamentu ikus ba torre sia hodi halo dezeñu no Bill of Quantity (BoQ), maibé iha difikuldade atu ba terrenu liuliu halo movimentu tanba iha situasaun COVID-19,” nia akresenta.
Maski tékniku empreza estatál ne’e finaliza ona serbisu halo dezeñu no BoQ ba torre hitu, maibé presiza haree modelu rekonstrusaun hodi bele garante kualidade.
“Ita-nia tékniku sira dezeñu ona torre hitu, ne’ebé kontinua esforsu halo hela prosesu dezeñu tékniku atubele halo intervensaun ka rekuperasaun lalais,” nia hatutan.
Torre liña transmisaun ne’ebé hetan estagu iha parte Hera, Tibar, Maliana no Suai.
Sekretariadu Grante Projetu aloka ona orsamentu millaun $8 atu halo rekuperasaun ho baze mekanizmu implementasaun hosi EDTL,E.P.
Jornalista : Florêncio Miranda Ximenes
Editora : Julia Chatarina
