DILI, 22 setembru 2021 (TATOLI)–Governu liuhosi reuniaun Konsellu Ministru (KM) kontinua propoin ba Prezidente Repúblika, Francisco Guterres ‘Lú Olo’ atu renova Estadu Emerjénsia (EE) ba dala-XVIII durante loron 30 tan.
Enkuantu, EE ba dala-XVII ne’ebé sei vijente hela, hahú hosi oras 00:00 iha loron 31 agostu 2021 no sei termina iha oras 23:59 iha loron 29 setembru 2021.
“Ho hanoin katak kauza determinante sira ne’ebé justifika ona deklarasaun Estadu Emerjénsia no ninia renovasaun sira kontinua mantein, atubele evita no neutraliza risku propagasaun sira hosi variante foun SARS-CoV-2, nune’e bele proteje saúde públika no kapasidade resposta hosi Sistema Nasionál Saúde,” Ministru Fidelis relata hafoin reuniaun ezekutivu, iha Palásiu Governu, kuarta ne’e.
Notísia relevante: EE da-XVII permite realizasaun eventu relijiozu, sosiál, kultura no desportu
Desizaun ne’e Governu hala’o hafoin analiza ba aprezentasaun kona-ba pontu situasaun epidemiolójika país hosi koordenadór sira iha Sala Situasaun, Sentru Integradu Jestaun Krize (CIGC, sigla portugés).
Renovasaun EE sei permite suspensaun ka restrisaun ba direitu no garantia fundamentál balun.
Jornalista : Antónia Gusmão
Editora : Julia Chatarin
