BOBONARO, 22 setembru 2021 (TATOLI)—Polísia Nasionál Timor-Leste (PNTL), Komandu Munisípiu Bobonaro, fó pose ba membru Konselu Polisiamentu Komunitáriu (KPK), hamutuk 105 hodi garante pas no estabilidade iha postu administrativu Lolotoe, Munisípiu Bobonaro.
Komandante PNTL munisípou Bobonaro, hanesan mós Prezidente Konsellu Seguransa Munisípiu (KSM), Superintendente Antoninho Mauluta, hateten prezensa KPK sai solusaun únika atu konsola povu moris ho hakmatek iha aldeia, nune’e bele redús númeru konflitu no kazu disputa.
Notísia relevante:Janeiru-setembru PDHJ Bobonaro rejista keixa violasaun direitu umanu 21
“Imi mak tenke akonsella no rezolve problema ne’ebé mosu iha imi leet. Tenke tuur hamutuk hodi fó hanoin ba malu nafatin, evita kualkér problema iha suku,” Mauluta iha Lolotoe Vila, kuarta ne’e.
Membru KPK hirak ne’ebé PNTL Bobonaro tula responsablidade, balun veteranu, autoridade lokál no komunidade ne’ebé tuir ona formasaun hosi KPK ho parseiru Asia Foundation durante semana ida.
Reprezentante Konsellu Veteranu munisípiu Bobonaro, Gilberto da Conceição ‘Beluli’, dezafia membru KPK sira atu hatudu serbisu ho responsablidade no tau aas liu interese komún.
Nune’e mós administradór postu administrativu Lolotoe, Alberto Seixas Perreira, husu membru KPK atu serbí ho fuan no profisionál, maski Governu seidauk fó insentivu.
Liu hosi Kompromisu, membru KPK 105 lee hodi deklara, sei serbisu ho espíritu voluntarizmu ba interese nasaun, hodi kontribui ba dezenvolvimentu seguransa no promove dame, estabilidade iha aldeia, suku no postu administrativu.
Sei kolobara ho PNTL munisípiu, eskuadra no Ofisiál Polisia Suku, hodi kria parseria forte ho membru komunidade ba lala’ok polisiamentu ne’ebé foka ba preventivu no pro-ativu.
Defende legalidade direitu povu iha suku atu moris iha ambiente armonia, hakmatek no seguru.
Esforsu hamutuk ho OPS no entidade relevente-sira iha suku, hodi kria konsiénsia no matein seguransa no órden públiku iha suku no postu administrativu.
Membru KPK hirak-ne’e sei koloka iha suku hitu hanesan, Gildapil, Opa, Lupal, Lebos, Guda, Lontas no Deudet.
Kada suku sei koloka membru KPK hamutuk na’in 15 ne’ebé sei hetan koñesimentu hosi autoridade-sira hodi serbisu hamutuk ho PNTL, garante seguransa no moris hakmatek ba komunidade.
Jornalista: Sérgio da Cruz
Editór: Cipriano Colo
