iklan

EKONOMIA, MUNISÍPIU, VIQUEQUE

Udan estraga tan hare iha Uatulari

Udan estraga tan hare iha Uatulari

Udan boot estraga tan hare iha natar ne’ebé pertense ba postu administrativu Uatulari, munisípiu Viqueque, kuarta (22/09/21). Imajen facebook.

VIQUEQUE, 22 setembru 2021 (TATOLI)—Udan boot ne’ebé akontese iha kuarta madrugada, estraga tan hare iha natar ne’ebé pertense ba postu administrativu Uatulari, munisípiu Viqueque.

“Hare balun komunidade sama hotu ona no balun foin ko’a, maibé udan ho intensidade boot, bee tama natar laran, hoban halo hare aat hotu,” Agrikultór, Abrão da Silva, informa ba jornalista via telefónika.

Notísia relevante:Udan boot estraga hare iha Uatulari

Situasuan ne’e halo komunidade agrikultór lakon hare barak, tanba ne’e husu ba Governu atu fó apoiu tratór boot hodi tula sai hare hosi natar laran.

Nune’e mós agrikuktór Júlio do Rosário informa, katak, ninia hare mós bee hoban estraga hotu la aproveita buat ida tanba bee boot.

Agrikultór ne’e triste, maibé nia mós rekoñese katak, buat ida natureza ne’e ema la espera atu akontese derrepente.

Tanba ne’e, nia husu apoiu Governu liuliu Ministériu Agrikultura no Peska (MAP) atu ajuda transporta sai hare balun ne’ebé ko’a ona, nune’e populasaun bele uza ba nesesidade família.

Kona-bá ne’e, Xefe Suku Uaitame, José do Rosário, rekoñese katak,  udan boot ohin dader estraga duni hare populasaun, maibé nia rasik seidauk simu dadus ruma.

Tanba ne’e autoridade lokál ne’e sei esforsu an atu bele rekolla dadus hosi komunidade, hodi hatene loloos kuantidade hare ne’ebé hetan estragu iha loron ohin.

Iha 14 setembru 2021 mós, udan boot estraga hare povu agrikultór iha postu administrativu Uatulari, munisípiu Viqueque, ne’ebé iha hela períudu kolleta.

Jornalista: Vitorino Lopes da Costa

Editór: Cipriano Colo

iklan
iklan

Leave a Reply

iklan
error: Content is protected !!