BAUCAU, 22 setembru 2021 (TATOLI)–Diretór servisu munisípal edukasaun munisípiu Baucau, Augosto Ornai Ximenes, liuhosi enkontru fiskalizasaun ho Komisaun G Parlamentu Nasionál (PN), ne’ebé trata asuntu Edukasaun, Kultura, Juventude, Desportu no Sidadania, hato’o difikuldade servisu edukasaun ba deputadu sira.
“Difikuldade servisu edukasaun munisipál nia mak estrutura funsionál atu responde servisu Ministériu Edukasaun, Juventude no Desportu (MEJD) nia laiha, ita fó de’it serbisu non job,” Diretór hateten iha sala VIP, Administrasaun Baucau, Villa nova, kuarta ne’e.
Bazeia ba dekretu-lei númeru 3, deskonsentrasaun estrutura funsionál ne’ebé liga ho servisu edukasaun tuir diploma ministeriál númeru 16, ne’ebé hateten diretór ida ho xefe departamentu rua hodi responde programa hirak ne’ebé ministériu deskonsentra ona mai munisípiu.
Maibé, iha parte seluk servisu edukasaun munisipál asume hela knaar hosi MEJD ne’ebé seidauk deskonsentra, enkuantu estruturamente ministériu hasai ona ninia estrutura funsionál ne’ebé difikulta servisu edukasaun munisipál.
“Serbisu sira ne’ebé ministériu ninian laiha estrutura funsionál, ita fó de’it ema responsável ba área ne’ebé uluk departamentu maibé ita hasai tiha, hanesan departamentu ensinu, dadus infraestrutura, jestaun Administrasaun eskolar, ne’ebé ema hirak ne’e agora non job hotu, maibé ita fó serbisu todan hanesan ho xefe departamentu, entaun ne’e difikuldade, ita haruka ema lori kontainer boot maibé selu sira tuir kondutór mikrolet,” nia akresenta.
Prekupasaun seluk kona-ba mandatu diretiva eskola sira, hahú hosi diretór eskola, adjuntu, gabinete apoia téknika no koordenadór eskolar ne’ebé to’o agora seidauk iha desizaun ruma hosi nasionál hodi solusiona kargu refere.
Enkuantu, iha parte infraestrutura, ministériu daudaun ne’e hahú implementa programa konstrusaun no reabilitasaun infraestrutura edukativa maibé projeitu ne’e liuhosi grupu komunitáriu mak ezekuta, nune’e to’o agora foin hahú, bainhira tempu udan bele fó impaktu ba prosesu aprendizajen.
“Ita koko kontinua husu ba Ministru atu implementa lalais, nune’e to’o tempu udan bele utiliza ona,” Augosto hateten.
Kona-ba progressu ezekusaun orsamentu ba servisu edukasaun munisipál rasik hasoru difikuldade iha parte transferénsia públika, liuhosi programa merenda eskolar ne’ebé foin mak ezekuta de’it ba loron lima ho osan $25.000 hosi totál orsamentu $800.000 resin tanba suspensaun eskola kauza hosi serka sanitária.
Difikuldade seluk mak transporte ne’ebé ho kondisaun kareta rua ne’ebé utiliza hosi servisu edukasaun munisipál no inspesaun eskola uza kuaze tinan 10 ona no labele utiliza ba operasionál tanba laiha manutensaun.
Iha fatin hanesan, Prezidente Komisaun G, António Verdial, hateten, sei rejista preokupasaun hirak ne’ebé hato’o no promete sei solusiona ho parte MEJD iha debate Komisaun permanente espesializada.
Jornalista : Natalino Belo
Editora : Julia Chatarina
