OÉ-CUSSE, 23 setembru 2021 (TATOLI)—Autoridade RAEOA liuhosi programa food for work, kinta ne’e distribui foos saka-138 ba komunidade aldeia Usapibel, suku Lalisuk, sub-rejiaun Pante Makasar
Sekretáriu Rejionál Asuntu Administrasaun, Martinho Abani Elo, hateten progarama ne’e atu motiva komunidade hadi’a no normaliza estrada hosi bairru Mautaunome ba bairru Fatununi ho distánsi kilómetru rua-resin, hodi bele fasilita transporte públiku no movimentu ema-nian hodi lori sira-nia produtu atu asesu ba merkadu.
“Ohin, autoridade oferese foos saka ida-ida ba kada uma kain, tanba komunidade nia inisiativa rasik hakarak hadia estrada, taka kuak, hamoos baleta, atu nune’e transporte sira ho komunidade sira bele lori nia produtu asesu ba merkadu ho seguru,” Martinho Abani hateten.
Nia apela ba komunidade sira atu labele diskrimina malu ho kór politika maibé kria unidade no pás iha suku laran, atu servisu hamutuk lori suku sai furak iha Oé-Cusse tanba autoridade apoiu komunidade tomak iha rejiaun Oé-Cusse la’ós iha fatin ne’e de’it.
Iha biban ne’e, Sekretáriu Rejionál Administrasaun ne’e mós hala’o sensibilizasaun kona-bá medida prevensaun COVID-19 no husu komunidade atu hakbesik-aan ba fasilidade saúde atu simu vasina, nune’e bele prevene-aan hosi moras COVID-19.
Xefe Aldeia Usapibela, Jacob Cusi, agradese ba autoridade RAEOA no husu atu kontinua nafatin programa ne’e hodi motiva komunidade atu hadia rasik sira-nia estrada hodi evita dezastre.
“Ami kontente tanba autoridade fasilita ami atu hadi’a rasik ami-nia estrada iha aldeia no bairru laran. Ida-ne’e inisiativa di’ak tebe-tebes atu hadi’a estrada ne’ebé kondisaun grave, nune’e lori transporte ho di’ak no labele hamosu dezastre,” nia dehan.
Entretantu, estrada ne’ebé komunidade aldeia Usapibela normaliza hosi bairru Fatununi to’o bairru Mataunome hamutuk kilometru rua-resin hodi fasilita komuunidade uma kain hamutuk 137 be asesu.
Jornalista : Abílio Elo Nini
Editor : Cancio Ximenes
