OÉ-CUSSE, 23 setembru 2021 (TATOLI)—Eskola Bázika Sentrál (EBC, sigla portugés) daudaun ne’e prepara ona materiál sira atu kumpre protokulu saúde, hodi re-ativa aula prezensiál iha segunda (27 setembru) semana oin.
“Profesór sira iha agrupamentu EBC Palaban hamutuk eskola-ualu (8) garantidu ona hotu-hotu kumpre sirkulár ne’ebé fó sai hosi autoridade, atu tama hanorin hanesan baibain maibé tenke kumpre distánsia sosiál, uza máskara no tenke simu vasina. Ami preparadu no semana oin ami hahú aula prezensiál,” Diretór EBC Palaban, Vincencio Cono, informa ba Agência Tatoli iha Palaban, Oé-Cusse, kinta ne’e.
Atu re-ativa aula prezensiál, EBC Palaban hahú realiza ona dezinfetante ba eskola sira tanba hetan apoiu hosi Crus Vermelha Oé-Cusse, tanba profesór sira prepara ona rezumu atu oferese ba estudante sira ho fasil ba atividade aprendizajén liu-liu estudante klase nono-ano, tanba sira prepara atu partisipa iha ezame nasionál tinan ne’e.
“Ami simu ona karta sirkulár hosi edukasaun iha 21 setembru ne’e, entaun ami konvoka ona enkontru atu fó sai orientasaun jerál ba koordenadór ba eskola EBF sira. Iha enkontru hamutuk ne’e fó sai regulamentu sira atu kumpre protokolu saúde. Ha’u garante katak, sei laiha profesór atu kontra tanba ne’e regulamentu Governu nian, hotu-hotu tenke kumpre iha prosesu aula prezensiál,” nia dehan.
Nia informa, Profesór sira iha EBC Palaban ne’e 95% vasinadu no daudaun ne’e prepara ona dadus ba estudante idade 12 to’o 17 atu partisipa simu vasina Pfizer.
Entretantu totál profesór iha agrupamentu EBC Palaban kuaze na’in-100, kompostu hosi Eskola Bázika Filiál haat (4) no Pre-Eskolár tolu (3) maka hanesan EBF 28 Agostu Santa Rosa, EBF Um de Maio Palaban, EBF 30 agostu Masin no EBF Noapai Padiae no Pre-Eskolár sira mak hanesan Pre-Eskolár Atoni Oé-Cusse, Pre-Eskolár São Fransisco Moziño Padiae no Pre-Eskolár Kiubet-Manu Noapai.
Bee-moos sai problema iha EBC Palaban
Diretór Eskola Bázika Sentrál (EBC, sigla portugés) Palaban, preokupa kona-bá bee-moos nian, tanba iha eskola sira kuaze maioria menus bee-moos atu uza ba fase liman nian iha prosesu aprendizajén.
“Bee-moos fase liman mak tristeza boot ba EBC Palaban. Iha semana kotuk, ami submete ona karta proposta husu apoiu bee-moos ba Dirasaun Rejionál Infraestrutura no ba Departamentu Servisu Água no Saneamentu (DSAS), maibé to’o ohin seidauk mai distribui. Maibé ami espera semana oin hahú aula-prezensiál bele hetan ona apoiu kona-bá bee-moos,” nia dehan.
Hatan ba problema bee-moos, Diretór Edukasaun RAEOA, Daniel Mauno, informa daudaun ne’e nia simu ona proposta hosi eskola sira hodi submete ba Dirasaun Rejionál Infraestrutura atu fasilita distribui bee ba kada eskola hotu iha territoriu Oé-Cusse
“Eskola balun hato’o tiha ona sira pedidu, husu apoiu fasilidade tanke no balun iha tanke maibé bee kuaze laiha. Entaun, ita sei koordena ho parte Obra Públika servisu DSAS atu distribui bee ba eskola sira hotu, nune’e fasilita profesór no estudante sira atu fase liman,” nia dehan
Jornalista : Abílio Elo Nini
Editór : Cancio Ximenes
