DILI, 23 setembru 2021 (TATOLI) – Ministru Ensinu Superiór Siénsia no Kultura (MESSK), Longuinhos dos Santos, felisita papél Institutu Siénsia Saúde (ICS) nian ne’ebé forma ona rekursu umanu iha área esensiál atu hadi’a kualidade saúde iha Timor-Leste.
“Ha’u hakarak felisita no agradese Institutu Siénsia Saúde, tanba ninia papél forma ona rekursu sira iha área ne’ebé esensiál iha área saúde nian. Formasaun ba graduasaun foun sira ho grau bacharelato iha área enfermajen, farmásia, parteira no nutrisaun mak sai rekursu ida importante tebes atu hadi’a kualidade no dezempeñu iha servisu saúde TL nian,” Ministru Longuinhos hateten iha serimónia graduasaun finalista ICS iha salaun Madre Canosiana, Has-Laran, Dili, kinta ne’e.
Governante ne’e mós la haluha hato’o parabens ba graduadu 292 ne’ebé gradua ona. Nia dehan graduasaun ne’e hanesan aktu formál iha vida akadémiku ne’ebé sei reprezenta tranzisaun hosi vida pesoál atu bele aplika iha nasaun ida-ne’e.
ICS nu’udar instituisaun ne’ebé forma ema atu sai ema hodi servisu atu serbí povu no país ida-ne’e. Tanba ne’e, buka hadi’a kualidade formasaun atu sai ema ne’ebé profisionál iha área espesífiku ida ne’e.
Iha biban ne’e mós Reitór ICS, Domingos Soares akresenta katak normálmente graduasaun ne’e bele konsidera nu’udar kolokasaun ba grau ne’ebé estudante sira mai estuda atu hetan rekoñesimentu akadémiku.
“Sira na’in 292 ne’ebé gradua ne’e kompostu hosi fakuldade haat ho grau akadémiku bacharelato mak hanesan Fakuldade Enfermajen na’in-154, Fakuldade Farmasia na’in-37, Fakuldade Parteira na’in-79 no Fakuldade Nutrisaun na’in-22,” nia tenik.
Jornalista : Tomé Amado
Editór : Francisco Simões
