VIQUEQUE, 23 setembru 2021 (TATOLI)—Ministériu Administrasaun Estatál (MAE), liu hosi Vise-Ministru Lino de Jesus Torrezão, hamutuk ho administradór munisípiu Viqueque, Januário Soares ‘Bolly’ hatuur fatuk dahuluk ba moru administrasaun munisípiu Viqueque no jardín 59.
Lino de Jesus Torrezão, hateten iha munisípiu ida tenke iha ninia jardín hanesan fuan sidade-nian hodi hafurak ema nia matan.
Notísia relevante:MEJD sosializa programa ‘Eskola ba Uma’ iha Viqueque
“Kuandu jardín ne’e konklui ona, presiza kuda ai-oan atu sai matak,” nia hateten iha ámbitu lansamentu, kinta ne’e.
Iha fatin hanesan, administradór munisípiu Viqueque, Januario Soares ‘Bolly, hateten projetu rua ne’e, ho Orsamentu Jerál Estadu (OJE) 2020, maibé hetan aprovasaun iha 2021.
Projetu rua ne’e konstrusaun moru administrasaun kompañia Darda Unipesoal,Lda no jardín 59 ezekuta hosi kompañia Peacefull Unipesoal,Lda.
Orsamentu ba konstrusaun jardín hamtuk $273.301,49 no moru hamutuk $233.346,66, durasaun kontratu ba konstrusaun fulan neen.
Jornalista: Vitorino Lopes da Costa
Editór: Cipriano Colo
