VIQUEQUE, 23 setembru 2021 (TATOLI)—Ministériu Administrasaun Estatál (MAE), liu hosi Vise-Ministru, Lino de Jesus Torrezão, lansa programa Mão de Obra iha suku Uma Ki’ik, postu administrativu Viqueque Villa, munisípiu Viqueque.
Lino de Jesus Torrezão, hateten programa ne’e tama iha Orsamentu Jerál Estadu (OJE) 2021, ne’ebé tuir loloos aloka ba kada postu administrativu ho montante rihun $100, maibé mosu situasaun COVID-19, nune’e orsamentu tama fali ba fundu infraestutura, hodi halo retifikasaun.
Notísia relevante:Implementasaun Programa Mão de Obra atinje 75%
“Depois orsamentu la la’o iha fulan neen, fundu ne’e uza hodi ba atende fali vítima afetadu dezastre naturál ne’ebé akontese iha 4 abríl 2021. Tanba ne’e maka programa Mão de Obra iha kada postu adiministrativu hetan rihun$50,” nia hateten.
Nia husu administradór-sira atu utiliza orsamentu programa Mão de Obra ho di’ak hodi prodús rezultadu ne’ebé mak di’ak.
Iha fatin hanesan, Xefe suku Uma Ki’ik, Hermenegildo Rangel, agradese ba prezensa Vise-Ministru hodi halo lansamentu ba programa Mão de Obra, hanesan projetu $5 ba komunidade.
“Ho programa ne’e, ami sente kontente no agradese ba Governu,” Hermenegildo Rangel, hateten iha sede suku Uma Ki’ik, kinta ne’e.
Nune’e mós administradór munisípiu Viqueque, Januário Soares ‘Bolly’, konsidera programa Mão de Obra responde ba situasaun pandemia COVID-19, iha ne’ebé povu susar atu hetan serbisu.
Administradór postu administrativu Viqueque, António Gregório relata, programa Mão de Obra iha postu administrativu ne’e, implementa ona hahú hosi fulan jullu to’o agora, iha suku tolu mak halo ona pagamentu no iha suku hitu mak foin hahú.
Programa Mão de Obra iha postu administrativu Viqueque Villa, lori benefísiu ba benefisiáriu ba populasaun hamutuk 1.006.
Jornalista: Vitorino Lopes da Costa
Editor: Cipriano Colo
