DILI, 23 setembru 2021 (TATOLI)—Psychosocial Recovery and Development in East Timor (PRADET), kinta (23/09) ne’e fó formasaun kona–bá ‘Promove Saúde Mentál iha Situasaun Pandemia COVID–19’ ba Ajentestorál Parokia Bedois.
Koordenadór Programa Asisténsia ba Moras Mentál, Psychosocial Recovery and Development in East Timor (PRADET), Nicolau Vicente Ximenes, hateten formasaun ne’e atu konsesializa no hasa’e ajente pastorál sira-nia kuñesimentu oinsá promove saúde mental durane pandemia COVID-19 ne’e.
“Formasaun ida-ne’e atu konsesializa no hasa’e sira–nia koñesimentu kona–bá oinsá promove sira–nia saúde mentál rasik, tanba iha situasaun pandemia COVID–19 ida-ne’e mós afeta psikolojikamente hanesan halo halo stess, tauk, tanba atrapalha iha situasaun ida-ne’e,” Nicolau Vicente Ximenes hateten ba Agência Tatoli iha salaun parokia Bedois, Dili.
PRADET nia prezensa atu fanu nafatin sira hodi haforsa sira–nia saúde mentál liuhosi atividade fahe informasaun no mós ezêrsisiu balun, hanesan oinsá maneza emosaun atu bele haforsa di’ak liután sira–nia saúde mentál, hodi hala’o sira–nia kna’ar hanesan baibain.
Aleinde ne’e, nia dehan, TANBA partisipante sira-ne’e mak loro-loron hamutuk ho komunidade no bele fahe tutan ba iha sira–nia familia, viziñu no komunidade en jerál, hodi tulun maluk sira ho problema mentál ka problema psikolójia, sira bele tulun liuhosi halo referensia ba PRADET no Sentru Saúde sira.
“Nune’e, ema hirak ne’e bele hetan tratamentu médiku ruma ka asisténsia dignu no própriu,” nia informa.
Matéria formasaun ne’ebé habelar ba partisipante sira-ne’e mak koñesimentu kona–bá saúde mentál, moras mentál, stress, maneza emosaun, tentativa oho aan, prevensaun ba COVID–19 no mós vasinasaun.
Konsellu Parokia Badois, Francisco Maria, hateten formasaun ne’e motiva sira atu bele habelar fali infomasaun kona-bá oinsá atu hamatan ba ema moras mental sira iha situasaun COVID-19 ba komunidade iha sira ida-idak nia hela fatin.
“PRADET ninia informasaun ida-ne’e, fó hanoin mai ami no motiva mós ami, atu bele fó informasaun ba komunidade no sarani sira ne’e’bé la tuir formasaun ne’e,” nia dehan.
Entretantu, formasaun kona–bá ‘Promove Saúde Mentál iha Situasaun Pandemia COVID–19’ ba Ajente Pastorál Parokia Bedois ne’e durante loron rua (23-24 setembru), ho totál partisipante hamutuk na’in–25 ne’ebé kompostu hosi grupu orasaun de bairru, akolitus, xefe bairu orasaun, grupu THS–THM, no grupu animadór sira.
Planu ba oin, PRADET sei kontinua halo sensibilizasaun ka formasaun kona–bá Promove Saúde Mentál ba Konsellu Suku Kuluhun, Fatuhada, no grupu Guarda Prizióneiru sira iha BECORA, Gleno, no mós ba maluk sira ne’ebé servisu hanesan Saneamentu.
Jornalista : Nelia Fernandes
Editór : Cancio Ximenes
