DILI, 22 setembru 2021 (TATOLI)—Sekretaria Estadu Formasaun Profisionál Empregu (SEFOPE) submete ona ezbosu lejizlasaun atu regula traballu doméstiku ba Ministériu Koordenadór Asuntu Ekonómiaku (MKAE) atu haree hodi submete ba Konsellu Ministru.
“Ami durante ne’e akompaña, ita-nia traballadór sira iha rai-laran sempre hato’o keixa, tanba ne’e, atu regula atu empreza sira labele viola traballadór sira-nia direitu, ami submete ona ezbosu lei traballu doméstiku ba Ministériu Koordenadór Asuntu Ekonómika atu haree,” Diretór Nasionál Relasaun Traballu SEFOPE, Ângelo dos Santos Veloso, hateten iha edifisiu Caicoli, kinta ne’e.
Iha Lei Traballu artigu 3, fó dalan atu hamosu dekretu-lei espesífiku kona-ba regula traballu doméstiku.
“Ezbosu lei ne’e rasik ami uluk kedan prepara iha V Governu, maibé hafoin situasaun polítika, entaun momentu ne’ebá la konsege aprezenta. Agora ami submete hikas ona ba MKAE atu haree kestaun ida-ne’e,” nia akresenta.
Nia konsidera, lejizlasaun ne’e importante atu dignifika traballadór timor-oan ne’ebé serbisu iha rai-laran.
“Presiza iha lei espisífiku atu regula, nune’e empregadór labele viola direitu ba saláriu, ne’ebé iha kazu ne’e hanesan saláriu extra sira,” nia subliña.
Jornalista : Natalino Costa
Editora : Julia Chatarina
