OÉ-CUSSE, 24 setembru 2021 (TATOLI)—Sentru Informasaun COVID-19 iha Rejiaun Administrativa Espesiál Oé-Cusse Ambeno (RAEOA), sesta ne’e rejista kazu pozitivu foun rua (2), ativu 47 no rekoperadu 260.
Notísia Relevante: COVID-19 iha RAEOA: pozitivu haat, ativu 54 no rekoperadu 238
“Ohin, ita rejista kazu pozitivu foun rua (2), kazu ativu ka baixa hela iha sala izolamentu hamutuk 47 no rekopera ona hosi izolamentu hamutuk 260,” Sekretáriu Rejionál Asuntu Saúde, Manuel da Costa, informa ba Agênsia Tatoli iha Sikluli, Oé-Cusse.
Kazu ativu 47 ne’e, daudaun ne’e kumpre hela iha sala izolamentu Kiomaonteko na’in-hitu (7), izolamentu Alfandega Mahata na’in-haat (4), izolamentu Kliníka Kurasaun na’in-neen (6), no iha izolamentu Kitahara Mahata hamutuk na’in-30.
Tuir dadus hosi 23 marsu 2020 to’o 23 setembru 2021, totál dadus komulativu kazu konfirmadu hamutuk 308, hasai teste swab 274, númeru RDT swab 192, komulativu teste swab 3.588, komulativu rezultadu negativu 3.349.
Dadus pasajeiru ne’ebé kumpre kuarentena obrigatóriu 1.719, auto-kuarentena 305 totál hamutuk 2.024 no pasa ona loron-14 hamutuk 1.925 no rejista óbitu ida.
Daudaun ne’e pasajeiru sira-ne’ebé tama iha Oé-Cusse kumpre hela loron 14 iha kuarentena hamutuk na’in-39, kuarentena Sakato na’in-rua (2), uma Dra.Catarina Anunu na’in-ida (1), kuarentena Eskola ETARO Masin na’in-31, auto-kuarentena rezidénsia Mateus Sufa na’in-ida (1), auto-kuarentena Palaban na’in-ida (1), auto-kuarentena Fulolo na’in-rua (2) Veronika Oématan na’in-ida (1).
Jornalista : Abílio Elo Nini
Editór : Cancio Ximenes
