DILI, 24 setembru 2021 (TATOLI)–Governu liuhosi reuniaun Konsellu Ministru (KM), aprova ona votu pezar no aprova Rezolusaun Governu ne’ebé dekreta lutu nasionál, ba falesimentu Ma’Huno Bulerek Karathayano.
“Lutu nasionál ne’e iha teritóriu nasionál tomak, ba períodu loron-tolu, hahú tuku 8:00 loron 25 setembru to’o tuku 07:59 loron 28 setembru. Durante períodu lutu nasionál, bandeira nasionál sei hasa’e to’o ai-rin klaran de’it (meia haste), iha nasaun laran tomak iha fatin sira ne’ebé maka obrigatóriu tenke uza, inklui iha misaun diplomátika sira,” Ministru Prezidénsia Konsellu Ministru, Fidelis Manuel Leite Magalhães, relata, hafoin reuniaun ezekutivu iha Palásiu Governu, sesta ne’e.
Notísia relevante: Ma’huno Bulerek Karathayano hakotu-iis tanba atakasaun
Saudozu Ma’Huno nu’udar antigu Komandante FALINTIL, antigu Sekretáriu Komisaun Diretiva FRETILIN no atuál Primeiru Vise-Prezidente Partidu CNRT.
Ma’Huno Bulerek hakotu iis lorokraik ne’e, iha Hospital Nasional Guido Valadares.
Jornalista : Antónia Gusmão
Editora : Julia Chatarina
