DILI, 24 setembru 2021 (TATOLI)–Governu liuhosi reuniaun Konsellu Ministru (KM) aprova ho alterasaun, Dekretu-Lei kona-ba rejime remuneratóriu FALINTIL–Forsa Defeza Timor-Leste (F-FDTL), ne’ebé aprezenta hosi Ministru Defeza, Filomeno da Paixão de Jesus.
“Projetu ne’e halo aumentu salariál besik 5% iha postu militár sira hotu no halo atualizaun ba suplementu rumenatóriu sira,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu, sesta ne’e.
Tuir Portavóz Governu, intervensaun lejizlativa ne’e ho objetivu atu hetan karreira militár ne’ebé atrativa liu, ho kondisaun salariál ida tuir modernizasaun no profisionalizasaun hosi Forsa Armada sira.
Nune’e mós, Ezekutivu sira hakarak mós atu armoniza diploma ne’e ho proposta alterasaun ba Estatutu Militár sira.
Aleinde ne’e, aprova mós ho alterasaun, Projetu Dekretu-Lei kona-ba rejime remuneratótiu hosi Polísia Nasionál Timor-Leste (PNTL), ne’ebé aprezenta hosi Primeiru-Ministru no Ministru Interiór, Taur Matan Ruak no hosi Vise-Ministru Interiór, António Armindo.
“Ho projetu ida-ne’e, halo aumentu remuneratóriu globál ho valór 5% hosi remunerasaun baze no halo atualizasaun ba suplementu remuneratóriu,” Ministru esplika.
Nune’e, intervensaun lejizlativa ne’e ho intensaun hakarak estimula membru PNTL sira bele prestasaun di’ak kumprimentu misaun polisiál atu dignifika no hasa’e profisaun.
Ho inisiativa hadi’a remuneratóriu bele halo armonizasaun sistema remuneratóriu PNTL, ho forsa seguransa seluk.
Jornalista : Antónia Gusmão
Editora : Julia Chatarina
