COVALIMA, 24 setembru 2021 (TATOLI)-Sentru Esperansa Ba Feto ka Uma Mahon Salele, Suku Maudemo, Postu Tilomar, Munisípiu Covalima, sai mahan ba vítima violénsia seksuál, violénsia bazeia ba jéneru inklui labarik abandonadu.
“Hahú iha Janeiru to’o ohin loron ami atende ona vítima 74, hosi númeru ne’e balun fila ona ba nia família no agora daudaun vítima 58 hela iha uma mahon Salele,” Diretora Uma Mahon, Madre Santina Imaculada de Oliveira hateten ba jornalista iha Santa Rosa, sesta ne’e.
Nia informa, uma mahon Salele fatin fó mahan ba vítima violénsia seksuál, violénsia bazeia ba jéneru inklui labarik abandonadu na’in 58, iha uma mahon.
Papél hosi uma mahon Salele importante atu halibur, fornese no fasilita, fó mahan ba vítima sira hodi tuir prosesu akonsellamentu no fó asisténsia ba vítima.
Serbisu ne’ebé sira hala’o hamutuk ho Ministériu Solidariedade Sosiál no Inkluzaun (MSSI), Rede Feto, ALFeLa, Polísia hodi apoia sira iha prosesu legál buka rezolve problema no aprezenta ba Ministériu Públiku.
Madre Santina dehan, uma mahon Salele la’ós atu fó mahan de’it ba vítima violénsia seksuál, violénsia bazeia ba jéneru inklui labarik abandonadu maibé kapasita vítima sira iha área ospitalidade no agrikultura.
Jornalista : Celestina Teles
Editór : Francisco Simões
