DILI, 25 setembru 2021 (TATOLI) – Komité Sentrál Frente Revolusionária Timor-Leste Independente (CCF, sigla portugés), sábadu ne’e, aprova ajenda haat inklui realizasaun data ba kongresu nasionál iha 2022.
Sekretáriu Jerál Partidu FRETILIN, Mari Alkatiri lidera reuniaun ida iha Politéknika Hera, hodi aprova ajenda haat (4) inklui realizasaun kongresu nasionál.
Molok hahú reuniaun, Sekretáriu Jerál FRETILIN, Mari Bim Amude Alkatiri, husu ba membru CCF halo “Um Minuto de silêncio” ba saudozu Ma’Huno Bulerek Karathayano.
Reunion ne’e diskute asuntu haat kompostu hosi ajendamentu ba Kongresu FRETILIN dalimak, prerrogasaun mandatu ba estrutura nasionál no baze, konfirmasaun ba nomeasaun ba membru Komisaun Nasionál Preparasaun Organizadora (KNPO) ho sira-nia mandatu, no mandatu ba sekretariadu nasionál atubele hahú konferénsia sira iha nivel Postu Administrativu, Munisipál/Rejiaun Espesiál inklui eleisaun ba delegadu sira.
“Ohin reuniaun CCF ne’ebé aprova deliberasaun haat inklui aprova mós ajendamentu ba Kongresu Nasionál ne’ebé sei akontese iha 2022. Kona-ba fulan atu realiza ne’e provavelmente sei akontese iha setembru 2022,” Adjuntu Sekretáriu Jerál FRETILIN, Flávio Maria Guterres da Silva informa ba Agência TATOLI, liuhosi telefónika.
Adjuntu Sekretáriu Jerál ne’e dehan, ajenda detallu kona-ba kongresu ne’e sei hein fali KNPO ne’ebé harii ona depois sei halo ajenda no aprezenta ba reuniaun CCF nian iha fulan-dezembru nia laran.
Nia argumenta, razaun prorrogasaun mandatu ba estrutura nasionál no baze, tanba hotu-hotu konsiente katak tuir loloos mandate órgaun sentrál remata iha outubru.
“Buat sira-ne’e tanba de’it pandemia ne’e limita ita-nia movimentu. Sé pandemia ne’e laiha karik kalendarizasaun la’o ona,” nia fundamenta.
Nia dehan, partidu FRETILIN nia kongresu ne’e liuhosi prosesu lubuk ida mak hanesan hahú hosi konferénsia postu administrativu, konferénsia munisípiu, tanba konferénsia munisipál ne’e mak eleje mós delegadu atu mai iha Kongresu Nasionál.
Órgaun CCF ne’ebé partisipa iha reuniaun ne’e mak hanesan Komisaun Nasionál Jurizdisaun, Sekretáriu Jerál Juventude FRETILIN no Sekretáriu Jerál Mari Alkatiri mak lidera reuniaun ne’e. Proposta sira iha leten hetan aprovasaun hosi membru Komité Sentrál tomak ho votu unanimidade.
Ikusliu, Adjuntu Sekretáriu Jerál FRETILIN ne’e informa, ambiente reuniaun ne’e la’o ho hakmatek no susesu.
Maske Adjuntu Sekretáriu Jerál dehan, kongresu nasionál posibilidade sei realiza iha setembru 2022, maibé tuir informasaun ne’ebé Agência TATOLI asesu katak, eleisaun direita partidu nian sei realiza iha jullu 2022 no kongresu nasionál sei realiza iha agostu 2022.
Jornalista : Evaristo Soares Martins
Editór : Francisco Simões
