VIQUEQUE, 25 setembru 2021 (TATOLI)-Prezidente Konsellu Polisiamentu Komunitária (KPK) atuál Komandante Polísia Nasionál Timor-Leste (PNTL) Munisípiu Viqueque, Surpreendente Estevão Alves Quintão, fó ona pose ba membru KPK na’in-40 husi Suku Waimori, Postu Administrativu Viqueque Vila, Munisípiu Viqueque.
“Ba estabelesimentu KPK ida-ne’e, ami garante sei minimiza konflitu tanba envolvimentu KPK ne’e ha’u rasik mak lidera inklui lia na’in, joven-sira iha suku”, Xefe Suku Waimori, Francelino Antonio Gomes, ba Agência Tatoli iha Viqueque, sádadu ne’e.
Membru KPK sira tuur-hamutuk ona hodi diskute enkuadramentu legal sira no prosedimentu tesi-lia no haree mós formatu administrativa atu regula komunidade husik animal hakiak la’o liver iha sidade laran.
Surpreendente, Estevão Alves Quintão, hateten, KPK iha Munisípiu Viqueque instala ona suku 20 hodi garante ba estabilidade no minimiza konflitu iha suku laran.
“Saida maka ita presiza halo, ita haree ba oin atu minimiza kazu sira ne’ebé akontese iha suku laran,” nia hateten.
Nia dehan, garante ba estabilidade PNTL sei kontinua halo kolaborasaun ho parte autoridade suku-sira ne’ebé iha Munisípiu Viqueque.
Jornalista : Vitorino Lopes da Costa
Editór : Francisco Simões
