OÉ-CUSSE, 26 setembru 2021 (TATOLI)–Diretór Servisu Diresaun Rejionál Rejistu Sívil Notariadu Konservatória Rejiaun Administrativa Espesiál Oé-Cusse Ambeno (RAEOA), José Ase Neno Colo, hateten, fasilidade ba atendimentu públiku presiza halo manutensaun tanba kuaze a’at iha tinan barak nia laran.
“Ami presiza halo manutensaun ba fasilidade eletrónika ba atendimentu públiku hanesan scaner no komputadór, atu asegura database identidade ema nian, hanesan sertidaun moris, sertidaun óbitu, pasaporte, billete identidade, ne’ebé dokumentu sira ne’e importante, no ami-nia scaner a’at kleur ona seidauk hadi’a inklui kadeira no meza, ne’e nesesáriu no importante tanba ema barak mai trata dokumentu balun hamriik de’it,” Diretór Servisu Rejionál ne’e informa ba Agência TATOLI, via telefónika, iha Oé-Cusse, domingu ne’e
Fasilidade hanesan meza, kadeira no komputadór sira, Governu fasilita kedas iha tinan 2008 to’o ohin, maibé seidauk iha manutensaun, enkuantu mákina prodúz pasaporte eletrónika Governu instala iha Oé-cusse iha tinan 2017, maibé tanba scaner a’at, difikulta servisu notariadu.
Nia dehan, kona-ba problema hirak ne’e, Servisu Notariadu RAEOA hato’o ona pedidu ba Servisu Sentrál Rejistu Notariadu Nasionál inklui Autoridade RAEOA iha inísiu tinan ne’e, maibé to’o agora seidauk iha resposta.
“Espera molok tama tinan 2022 bele iha ona solusaun, tanba iha ekipamentu balu ein relasaun ho pasaporte no billete identidade importante tebes atu asegura ho di’ak tanba ekipa sira servisu ho sistema. Maibé durante situasaun Estadu Emerjénsia no Serka Sanitária, laiha implikasaun ba servisu notariadu, ami kontinua halo atendimentu no kada loron ami simu tratamentu dokumentu hosi ema na’in-50 ba leten, ne’ebé maioria trata sertidaun no billete identidade,” nia akresenta.
Jornalista : Abílio Elo Nini
Editora : Julia Chatarina
