DILI, 26 setembru 2021 (TATOLI)–Ministériu Turizmu, Komérsiu no Indústria (MTKI), liuhosi Diresaun Nasionál Empreendedorizmu ba Atividade Produtu Turiztiku, organiza atividade kompetisaun pintura hodi promove talentu joven.
Tuir Diretór Nasionál Empreendedorizmu ba Atividade Produtu Turíztiku, Julio Ximenes Ribeiro, atividade pintura ne’e ho objetivu atu komemora loron mundiál turizmu iha loron 24 setembru, ne’ebé kada tinan sempre komemora.
“Joven sira durante ne’e iha talentu, maibé ita seidauk tau prioridade, tanba ne’e liuhosi atividade sira ne’e, Ministeriu Turizmu Komérsiu no Indústria sei fó apoiu ba joven sira hodi bele insentiva sira-nia atividade, nune’e sira bele kontinua hatudu kreatividade ne’ebé maka sira iha,” Diretór Nasionál informa hafoin loke atividade pintura iha Sentru Informasaun Turíztiku, Lecidere, Domingu ne’e.
Tema nasionál ba komemorasaun loron mudiál turizmu tinan ne’e maka ‘promove marka turizmu liuhusi pintura’.
Grupu 10 maka partisipa iha atividade pintura ne’e, kompostu hosi Gembel, Arte furak, Arte Uma Lalatak, Mafima Arte no seluk tan.
Prémiu ba kompetisaun pintura ne’e, ba primeru lugar sei hetan $300, segundu lugar $420 no terseiru lugar $150.
Aleinde ne’e, Diresaun Jerál Turizmu no Diresaun Nasionál Negósiu sei prevee osan ba atividade sira hanesan hodi bele iha kontinuasaun.
MTKI iha ona hanoin atu tau osan iha iha tinan 2022 no 2023 hodi fortalese atividade joven sira nian, liuliu liga ba pintura.
“Ita bele alastra atividade ne’e ba munisípiu seluk no halo selesaun hosi munisípiu sira, nune’e sira ne’ebé maka tama top 10, ita sei dada mai iha nasionál hodi kompete iha nasionál,” nia akresenta.
Atividade seluk hosi komemorasaun loron mudiál turizmu ne’e, MTKI sei organiza seremónia no atividade limpeza iha kapitál Dili.
Jornalista : Natalino Costa
Editora : Julia Chatarina
