DILI, 26 setembru 2021 (TATOLI)–Komité Sentrál Frente Revolusionária Timor-Leste Independente (FRETILIN) no partidu Congresso Nacional Reconstrução de Timorense (CNRT) sei presta omenajen ikus ba Saudozu José Antonio Da Costa ‘Ma’Huno Bulerek Karathayano’.
Konkordánsia ne’e hafoin Adjuntu Sekretáriu Jerál FRETILIN, José Reis, ho membru Komité Sentrál FRETILIN sira koordena ho família matebian, nune’e sei liu CCF hafoin lori ba Muzeu Rezisténsia.
“Ma’Hunu nu’udar líder boot ida iha rezisténsia nia laran no no Fundadór ba ASDT/FRETILIN iha tinan 1974. Orsida sei liuhosi sede Komité Sentrál FRETILIN durante menutu lima hafoin mak liu Muzeu Rezisténsia,” Adjuntu Sekretáriu Jerál informa ba Agência TATOLI, iha mate-uma, Praia dos Coqueiros, domingu ne’e.
Notísia relevante: Família Saudosu Ma’Huno konkorda entrega mate-isin ba Estadu
Membru Komité Sentrál FRETILIN (CCF, sigla portugés) hanesan Adjundu Sekretáriu Jerál FRETILIN, José Reis, Vise-Prezidente FRETILIN, Francisco Miranda Branco no Francisco Vasconselos, halo koordenasaun ho família hodi hetan konkordánsia.
Presta omenajen iha CCF sei dirije hosi Sekretáriu Jerál FRETILIN, Mari Alkatiri, tanba horisehik iha Hera halo ona deliberasaun kona-ba onra no gloria ba Ma’Huno Bulerek.
Tuir ajenda ne’ebé iha, mate isin sei lori sai hosi rezidénsia Praia dos Coqueiros, liu CCF no sede Partidu CNRT hafoin entrega ba Estadu iha Muzeu Rezisténsia.
Jornalista : Evaristo Soares Martins
Editora : Julia Chatarina
