OÉ-CUSSE, 27 setembru 2021 (TATOLI)—Diretór Edukasaun RAEOA, Daniel Mauno informa, segunda ne’e ofisialmente reativa aula prezensiál iha eskola sira hosi pre-eskolár to’o nivél ensinu sekundária hodi prepara estudante sira atu tuir ezame nasionál.
Notísia Relevante: Posibilidade Edukasaun RAEOA sei re-ativa aula prezensiál iha 27 setembru
“Ohin, ofisiálmente re-ativa hikas aula prezensiál ba eskola sira hotu iha teritóriu Oé-Cusse, tanba autoridade suspende hahú kedas iha fulan agostu to’o ohin. Tan ne’e mak ohina ita hahú fali aula normál hanesan babain,” Daniel Mauno hateten ba Agênsia Tatoli iha Santa Rosa, Oé-Cusse.
Nia informa, sirkulár atu re-ativa aula prezensiál distribui ona iha kada eskola, atu kumpre regulamentu Organizasaun Saúde Mundiál nian hodi fase liman bebeik, uza máskara, no distansiamentu sosiál no la autoriza manorin sira-ne’ebé seidauk simu vasina ne’e konsidera hanesan falta.
“Sidadaun hotu-hotu tenke submete ba regulamentu ne’ebé fó sai ona hosi Edukasaun, tanba inspetór sira sei halo monitorizasaun ba kada eskola atu kumpri regulamentu ne’e,” nia dehan.
Vise-Diretór Eskola Sekundária Gerál (ESG) Palaban, Fransisco Nono, hateten iha ESG Palaban sei halo agrupamanetu kada turma hodi fahe rua, primeiru tuurma tama hosi tuku 8:00-10:30 no grupu segundu sei tama iha tuku 10:30 to’o tuku 1:00 meudia, atu kumpre distansiamentu sosiál.
“Ohin, ami hahú prepara hamoos sala-de-aula sira, depois sei fahe estdante ba grupu no sala ida ami fahe ba rua. Ida-ne’e atu kumpre regulamentu hosi sirkulár ne’ebé ministériu edukasaun fó sai ona,” nia dehan.
Entretantu Director EBC Palaban, Vincencio Cono, sujere ba autoridade RAEOA liuhosi ministériu edukasaun atu tau atensaun ba problema bee-moos iha eskola sira, nune’e hodi bele uza ba fase liman tanba maioria eskola sira ladún asesu ba bee-moos
Jornalista : Abílio Elo Nini
Editór : Cancio Ximenes
