VIQUEQUE, 27 setembru 2021 (TATOLI)—Federasaun Atletizmu Timor-Leste (FATL), hala’o kapasitasaun ba profesór ho estudante-sira kona-bá arbitrazen no treinadór, hodi lidera atividade desportiva iha munisípiu Viqueque.
Formasaun ne’e programadu hosi Sekretáriu Estadu Juventude no Desportu (SEJD), no bazeia ba politíka Governu katak, eskola sira hahú hosi baze, tenke hasa’e koñesimentu desportiva.
Notísia relevante:2021, FATL tau prioridade formasaun arbitrajen no treinadór
“Formasaun ne’e atu buka fini árbitru no treinadór, nune’e bele lidera jogu komunitária-sira iha aldeia, suku no postu,” Prezidente FATL, Afrânio Xavier Amaral, hateetn ba jornalista, iha sede juventude Viqueque, segunda ne’e.
Atividade ne’e Governu aloka orsamentu hamutuk rihun $64-resin, hodi kobre ba munisípiu hitu mak hansan Lautém, Manufahi, Manatuto, Aileu, Likisá, Viqueque no sei ensera iha Ermera, no kada munisípiu hala’o durante loron lima.
Partisipa iha formasaun ne’e, parte treinadór iha profesór hamutuk na’in 15, iha mós reprezentante joven na’in 15 ne’ebé delegadu hosi postu administrativu lima iha munisípiu Viqueque ho formadór maihosi FATL.
Jornalista: Vitorino Lopes da Costa
Editór: Cipriano Colo
