DILI, 27 setembru 2021 (TATOLI)–Ministériu Turizmu, Komérsiu no Indústria (MTKI), hamutuk ho Institute of Bussiness (IOB) organiza semináriu iha ámbitu loron mundiál turizmu iha loron 24 setembru, hodi ko’alia kona-ba turizmu tranformativu, sustentável no inkluzivu.
Vise-Ministra Turizmu, Komunitária no Kultura, Inâcia da Conceição Teixeira, hateten, parte akadémika no Governu hakarak haree hamutuk hodi kria mekanizmu dezenvolve transformasaun inkluzivu turizmu iha Timor-Leste ho ninian sustentabilidade ba futuru.
“Tanba ne’e, Ministériu Turizmu koopera hamutuk ho setór privadu no akadémiku atu dezenvolve turizmu Timor-Leste, tanba papél akademia ne’e importante tebes,” Vise-Ministra dehan iha salaun plaza IOB, segunda ne’e.
Pandemia ne’ebé akontese halo setór turizmu hetan impaktu maka’as, barak lakon serbisu, taka atividade negósiu, maibé balun sei sobrevive ho atividade ekonómika iha situasaun ne’e.
“Karik ita implenta turizmu inkluzivu, ha’u fiar ita bele rekupera ita-nia setór turizmu iha Timor-Leste,” Vise-Ministra akresenta.
Iha sorin seluk, Diretór Sentru Peskiza IOB, Juliavo Xavier, hateten, iha tinan 2020 reseita hosi setór turizmu kiik liu kompara ho tinan hirak liubá tanba impaktu hosi pandemia.
“Situasaun ne’e halo otelaria la funsiona ho di’ak, guest house ema la vizita tanba movimentu turíztiku menus,” nia hatutan.
Tanba ne’e, Diretór konsidera Governu presiza halo programa inkluzivu hodi rekupera hikas kestaun ne’e, ne’ebé Governu nafatin asegura turizmu lokál hodi bele fó espasu nafatin ba komunidade halo movimentu nu’udar turista lokál hodi bele hatama resita ba Estadu no kontribui ba reseita negósiu kiik sira.
Iha ámbitu ne’e, Diretór Sentru Peskiza IOB, Juliavo Xavier, lansa livru peskiza espesífiku ne’ebé ko’alia kona-ba modelu dezenvolvimentu turizmu iha illa Ataúro ho pájina 100 resin, ne’ebé sei entrega ba parte MTKI, setór privadu no IOB rasik hodi sai hanesan materiál hodi partilla ba estudante sira.
Seremónia ne’e partesipa hosi eis Prezidente Repúblika, José Ramos Horta no Fundadór IOB, Abel Larisina.
Joralista : Natalino Costa
Editora : Julia Chatarina
