BAUCAU, 27 setembru 2021 (TATOLI)–Sekretáriu Jerál Konsellu Munisipál Kombatente Libertasaun Nasionál Baucau, liuhosi Sekretáriu Jerál, Manuel ‘Alari’ da Costa Soares, husu joven kontinuadór atu banati tuir hahalok saudozu José António Gomes da Costa alias ‘Ma’Huno Bulerek Karathayano’ ne’ebé hakotu iis iha loron sesta (24/09).
“Saudozu ninia hanoin, ideia no vontade tomak, ne’ebé hatutan ba soldadu sira hodi kontinua eziste ne’e tenki kontinua moris iha joven jerasaun kontinuadór ninia laran atu banati tuir, liuliu oinsá fó an tomak iha prosesu faze daruak ba luta libertasaun povu,” Sekretáriu Jerál informa ba Agência TATOLI, iha ninia knaar fatin, Villa antiga, segunda ne’e.
Tuir Alari, Saudozu Ma’Huno, nu’udar elementu importante no save iha prosesu luta ba libertasaun pátria tanba funu-na’in nu’udar líder fundadór no durante luta hanesan ema ne’ebé ho vontade espíritu luta ba soldadu sira atu labele tauk no nakdedar hasoru okupasaun Indonézia.
Sekretáriu Jerál Konsellu konsidera, desizaun Governu halo deslutu nasionál hodi hasa’e bandeira meia haste ba saudozu, importante tebes atu entidade hotu bele kumpre hodi fó onra no omenajen ikus ba eroi nasionál Saudozu Ma’Huno.
Notísia relevante: Governu dekreta lutu nasionál loron-tolu ba falesimentu saudozu Ma’Huno
“Ita laran triste no hein katak líder sira ne’ebé sei moris bele sai testamuña atu konta tuir istória loloos kona-ba kontribuisaun funu-na’in Ma’Huno, nune’e jerasaun foun sira hatene no konta nafatin iha futuru,” nia akresenta.
Konsellu Kombatente lori naran veteranu munisípiu Baucau, hato’o sentidu profunda ba família ein lutada Saudozu Ma’Huno Bulerek Karathayano, ne’ebé hakotu ona iis no husik hela ona timor-oan hotu.
Jornalista : Natalino Belo
Editora : Julia Chatarina
