DILI, 28 setembru 2021 (TATOLI)–Koordenadór Pilar 7 ba COVID-19 iha Sentru Integradu Jestaun Krize (CIGC, sigla portugés), Nilton Do Carmo Da Silva, hateten bazeia ba investigasaun hosi ekipa vijilánsia, hatudu katak komunidade Quelicai na’in-54 ne’ebé mate la’ós kauza COVID-19.
“Ekipa vijilánsia halo investigasaun ba óbitu 54 iha Quelicai no konsege halo tracing no rapid test ba família kuaze 100 ho rezultadu na’in-neen mak pozitivu, nune’e óbitu na’in-54 la’ós kauza COVID-19,” Koodenadór Nilton da Silva, hateten iha Parlamentu Nasionál, tersa ne’e.
Notísia relevante: Ekipa konjunta hahú investiga kauza óbitu na’in-54 iha Quelicai
Investigasaun ne’e hala’o hosi ekipa konjunta kompostu hosi Ministériu Saúde (MS) nasionál no munisipál, CIGC Baucau, seguransa inklui lider komunitáriu.
Maski hosi informasaun ne’ebé rekolla, óbitu hirak ne’e iha sintoma COVID-19, hanesan isin manas, mear, dada iis ladi’ak, tanba mesak ho idade idozu.
“Ita-nian maluk sira ne’ebé mate iha postu Quelicai ne’e la’ós mate tanba COVID-19, maibé tanba tauk ba fasilidade saúde, balun mate hosi Baucau lori bá no barak maka ho idade avansadu ho sira nia moras seluk ka komorbidade,” nia akresenta.
Iha insíu fulan-setembru, taxa mortalidade iha Quelicai hamutuk 54, ne’ebé mak maioria idozu hosi suku hamutuk 15.
Tuir dadus hosi CIGC, munisípiu Baucau daudaun ne’e rejista óbitu hamutuk na’in-neen, ho totál kazu ativu hamutuk na’in-280, no totál kazu rejistadu hamutuk 1.363, ne’ebé tama ona klasifikasaun tranzmisaun komunitáriu.
Entretantu, hahú hosi marsu 2020 to’o 2021, Estadu Timor-Leste liuhosi Ministériu Saúde rejista kazu sidadaun mate tanba COVID-19 hamutuk 133.
Jornalista : Florêncio Miranda Ximenes
Editora : Julia Chatarina
