DILI, 28 setembru 2021 (TATOLI)—VIII Governu Konstitusionál konstinua husu Prezidente Repúblika atu halo renovasaun ba Estadu Emerjénsia (EE) ba da-XVIII atu evita propagasaun vírus.
“Husu ba sidadaun hotu atu kompriende renovasaun Estadu Emerjénsia , katak impozisaun ba limitasaun ka konstranjimentu ba liberdade sirkulasaun nian no movimentu iha territóriu nasionál atu evita propagasaun vírus ne’e,” Primeiru-Ministru (PM), Taur Matan Ruak, hateten iha debate pedidu renovasaun EE ba da-XVIII, iha sala plenária, Parlamentu Nasionál, tersa ne’e.
Iha sorin seluk, Governu hakarak hato’o rekoñesimentu ba públiku no hato’o agradesimentu ba funsionáriu Governu, tékniku, péritu, espesialista no voluntária, nasionál no internasionál sira hosi Estadu no Organizasaun naun-governamentál ne’ebé loron-loron tuun iha terrenu hodi buka ho profisionalizmu, empeñu no dedikasaun tomak hodi luta kontra vírus ne’e.
“Serbisu maka’as ne’ebé profisionál saúde hala’o iha liña frente hodi proteje sidadaun hosi COVID-19, absolutamente estraordináriu, sira merese hetan rekoñesimentu no apoiu hosi Governu.
Governu iha konsiénsia katak situasaun atúal hanesan risku ida hosi faze prezensa variante Delta virus SARS-Cov-2 nian iha teritóriu nasionál, nune’e la’ós tempu hodi hamamar medida sira ne’ebé adota ona, maibé la’os mós tempu atu dezanima.
“Timor Leste la’o iha dalan lo’os, ita hatene katak vasinasaun mak instrumentu ne’ebé efikás liu hodi prevene no kombate kazu sira ne’ebé grave liuhosi moras no ita kontinua investe maka’as iha vasinasaun ba populasaun tomak hodi bele simu vasina,” Xefe Governu afirma.
Tanba ne’e, PM Taur apela ba renovasaun esforsu no mobilizasaun iha nasaun hodi hasoru inimigu ne’ebé tama iha territóriu hodi fó ameasa populasaun.
Ba kestaun ne’e, Xefe Governu solisita Duputadu sira Parlamentu Nasionál atu konsidera proposta renovasaun ba Deklarasaun Estadu Emenjénsia, ne’ebé aprezenta Presidente Repúblika, hodi autoriza Estadu renova deklarasaun EE ba períodu foun ho loron 30.
Governu konsidera, tanba ho de’it renovasaun deklarasaun EE, suspensaun direitu fundamentál balun sei posível adota medida sira hanesan taka fronteira, halo kuarentena ba ema sira ne’ebé deskonfia hetan infetadu, izolamentu terapeútiku ba ema sira ne’ebé infetadu, halo impozisaun serka sanitaria.
“Atu evita alastramentu moras iha teritóriu nasionál no kria kondisaun hosi realizasaun atividade sosiál balun, sira ne’ebé adekuadu, nesesáriu no proporsionál atu hasoru ameasa pandémika iha ita-nia país,” nia subliña.
Jornalista : Florêncio Miranda Ximenes
Editora : Julia Chatarina
