VIQUEQUE, 28 setembru 2021 (TATOLI)—Xefe Suku Uma-kiik, postu administrativu Viqueque, munisípiu Viqueque, Hermenegildo Rangel, husu ba Governu liuliu Ministériu Administrasaun Estatál (MAE), atu reabilita sede suku ne’e, tanba kondisaun aat ona no la favorese utiliza iha tempu udan bainhira hala’o serbisu.
“Ha’u husu ba MAE reabilita lalais ami-nia sede suku ne’ebé agora daudaun kondisaun aat hela,” Hermenegildo Rangel, hateten ba jornalista iha sede suku Uma-kiik, tersa ne’e.
Notísia relevante:MEJD sosializa programa ‘Eskola ba Uma’ iha Viqueque
Sede suku ne’e konstrui iha tempu okupasaun Indonézia, no iha tempu UNTAET mak halo reabilitasaun no utiliza to’o agora.
Nia deskreve kondisaun atuál katak, kalen mós kuak ona no parede uma nian mós aat hotu ona, no bee tama iha tempu udan.
Iha fatin seluk, Diretór serbisu Programa Nasionál Dezenvolvimentu Suku (PNDS) Viqueque, Estevão de Carvalho, haktuir reabilitasaun suku ne’e tama ba responsabilidade PNDS, maibé depende autoridade sira aprezenta planu prioridade mak foin hetan reabilitasaun.
“Autoridade lokál-sira mak tenke relata ba PNDS atu bele halo reabilitasaun,” Estevão informa.
Suku Uma-kiik ho nia aldeia hamutuk ualu no iha abitante hamutuk 1.764.
Jornalista: Vitorino Lopes da Costa
Editór: Cipriano Colo
