DILI, 28 setembru 2021 (TATOLI)–Primeiru Ministru, Taur Matan Ruak, orienta ona membru Governu hotu atu hala’o kampaña vasinasaun ba sidadaun sira iha territóriu nasionál tomak.
“Ha’u fó ona instrusaun ba membru Governu, atu semana ikus sai hotu ba munisípiu sira hodi hala’o kampaña vasinasaun hodi hasa’e taxa partisipasaun sidadaun nian ba simu vasina prevensaun COVID-19,” PM Taur, hateten, iha ámbitu renovasaun Estadu Emerjénsia ba da-XVIII, iha sala plenáriu Parlamentu Nasionál, tersa ne’e.
Iha 07 setembru, programa nasionál kona-ba vasinasaun nian la’o nafatin ho ritmu di’ak, simu doze vasinasaun kontra Covid-19 nian ho total 1.112.380 , ne’ebé fornese hosi sistema COVAX no hosi país amigu sira hanesan Austrália, Xina, Japaun, Nova-Zelándia no Portugál.
Maibé, Xefe Governu dehan, hosi totál doze ne’e, seidauk ezekuta vasina 15.000, liuliu vasina barak maka programada atu to’o, inklui vasina Pfizer doze dahuluk ne’ebé atu vasina ba labarik no joven sira ho idade entre tinan 12 to’o tinan 17.
“Kuandu ita haree nia programada atu to’o ka prazu ramata, ita kria ona eskandalu boot ida, tanba país sira ne’ebé fó ita ho hanoin atu salva sidadaun sira nia vida, maibe la’ós fó atu ita estraga,” Xefe Governu afirma.
Timor-Leste atinje ona rezultadu di’ak husi inokulasaun vasina doze dahuluk nian ne’ebé to’o loron 21 fulan-setembru abranje besik 77,7% husi populasaun munisípiu Dili no 57,6% husi populasaun nasionál.
“Ha’u fiar katak ho ritmu vasinasaun ne’ebé rejistadu, númeru husi ema inokulada sira ho vasina doze daruak ne’ebé kontinua aumenta, mantein viavél no konretizavel objetivu vasina 80% husi populasaun elejivel sira iha Timor-Leste to’o tinan ne’e remata,” Eis Prezidente Repúblika ne’e afirma.
Tanba, ritmu ezekusaun hosi planu vasina nian ne’ebé di’ak permite atu hapara limitasaun no restrisaun graduál sira hodi impede propagasaun vírus iha territóriu nasionál no normalizasaun progresiva ba realizasaun atividade sosiál no ekonómika sira iha país.
Daudaun ne’e, Governu promove atu reabertura fazeada ba ensinu prezensiál iha munisípiu Dili, maske nune’e ba mós kontinua atenta ba evolusaun situasaun no prontu atu atua bainhira iha nesesidade.
“Ita dezeja katak filafali ba normalidade bele hala’o ho seguru no konsistente, fiar katak susesu ba ezekusaun Planu Vasinasaun nian sei reprezenta oportunidade foun hodi hasa’e limitasaun no restrisaun sira ne’ebé sei iha no kontinua fila-fali dalan kreximentu ekonómiku ne’ebé ita liu ona iha tinan 2019 tanba kauza husi pandemia,” nia afirma.
Nune’e, PM Taur husu ba Deputadu sira iha Parlamentu Nasionál atu apoia ba kampaña vasinansaun hodi bele hasa’e taxa partisipasaun sidadaun nia ba vasina prevene Covid-19.
Iha biban hanesan, Kordenador Pilar 7 ba COVID-19, iha Sala Situasaun Sentru Integradu Jestaun Krize (CIGC, sigla portugés), Nilton Do Carmo Da Silva, rekomenda ona ba Governu atu introdúz normalizadade foun.
“Ita atu introduz normalidade foun, ne’ebé ita iha faze tolu, ne’ebé daudaun ne’e ita koko hela prepara tranzisaun, maibé ita tenke hasa’e númeru vasina tuir tarjetu Organizasaun Mundiál Saúde 70%, hafoin implementa normalidade foun,” nia afirma.
Jornalista : Florêncio Miranda Ximenes
Editora : Julia Chatarina
