COVALIMA, 28 Setembru 2021 (TATOLI)—Servisu Protesaun Sívil no Jestaun Dezastre Naturál (SPSDN) disemina informasaun kona-bá klima La Nina ba komunidade no konselu suku sira iha suku Casabauc, postu administrativu Tilomar, munisípiu Covalima tan tuir previzaun ne’e iha fulan-outubru to’o dezembru sei akontese anin no udan boot iha Timor-Leste.
Notísia Relevante: Dezde setembru, SEPS alerta ona previzaun La Nina
Ekipa disemina informasaun ne’e ba iha área risku no fatin dezastre naturál iha suku Casabauc, atu nune’e komunidade bele antesipa klima ka fenomena La Niña (anin no udan Bo’ot) ne’e.
“Suku Cassabauc Trajetu ba dezastre naturál. Tanba ne’e mak ami mai atu fahe imformasaun ba ita-nia komunidade ne’ebe mak hela iha Cassabauc ne’e. Ami konvida vitima ne’ebé mak hetan dezastre iha fulan kotuk hetan apoiu aí-han no la’ós ai-han, husu kontinua halo preparasaun no prevensaun ba dezastre naturál,” Koordenadór Jestaun Dezastre Naturál, Quintino da Costa, informa liuhosi nia diskursu, tersa ne’e
Nia husu ba komunidade ne’ebé mak hela iha fatin risku hanesan komunidade hosi aldeia Colo Ama, Cawauman no aldeia Tabolo tenke antesipa molok anin no udan boot akontese iha fulan oin mai.
Reprezentante Administrador Postu Administrativu Tilomar, Dedianos Mau, apela ba komunidade iha Suku Cassabauc tenke toma atensaun ba dezastre naturál, tanba dezastre naturál atu akontese la espera.
“Ba komunidade ne’ebè mak hela iha fatin risku atu toma atensaun ba dezastre naturál ne’ebè mak fó sai, katak iha fulan oin mai sei akontese anin no udan boot atu akontese. Ita-boot sira tenke muda fatin ne’ebè mak iha área risku, udan no anin boot atu mai ne’e la aviza ba ita, nia mai ho derrepente de’it,” nia dehan.
Jornalista : Celestina Teles
Editór : Cancio Ximenes
