DILI, 29 setembru 2021 (TATOLI)—Governu liuhosi reuniaun Konsellu Ministru (KM) ordinária iha kuarta ne’e, aprova Projetu Dekretu-Lei, ba revogasaun Dekretu-Lei númeru 30/2008, loron 13 agostu, kona-ba rejime atribuisaun bolsa estudu ba estranjeiru.
Projetu Dekretu-lei ne’e aprezenta hosi Ministru Ensinu Superiór, Siénsia no Kultura (MESSK), Longuinhos dos Santos.
“Atribuisaun bolsa estudu ba estranjeiru sei regula hosi diploma ministeriál MESSK, tuir regulamentu hosi Fundu Dezenvolvimentu Kapitál Umanu (FDCH, sigla portugés),” Ministru Prezidénsia Konsellu Ministru, Fidelis Manuel Leite Magalhães, informa, hafoin reuniaun ezekutivu, iha Palásiu Governu, kuarta ne’e.
Inisiativa ne’e mai ho hanoin atu garante loloos aplikasaun regulamentu FDCH, hodi hadi’a mekanizmu protesaun ba estudante timor-oan sira iha estranjeiru no atu klarifika, hadi’a no moderniza sistema jurídiku iha setór ensinu superiór nian.
Iha tinan 2020, benefisiáriu ba bolsa estudu hamutuk 1.154 no meta iha 2021 mak atu forma tan bolseiru 2.345, kompostu hosi feto 1.115 no mane 1.230.
Funsionáriu ne’ebé sai benefisiáriu formasaun téknika hamutuk 4.482 ho tuir meta atu fó formasaun tan 16,890, kompostu hosi feto 8.364 no mane 8.526.
Hahú 2011 to’o outubru 2020, FDCH liuhosi programa formasaun profisionál, forma ona joven 32.678, ba programa formasaun téknika ne’ebé hosi funsionáriu públiku hamutuk 32.688, benefisiáriu ba programa bolsa estudu 5.266 no programa formasaun tipu seluk hamutuk 11.295.
Programa bolsa estudu liuliu estudante sira ne’ebé sei ativu to’o agora hamutuk 1.151, sira ne’ebé gradua ona purvolta 3.848 no kanseladu ho razaun mate 267.
Jornalista : Antónia Gusmão
Editora : Julia Chatarina
