DILI, 29 setembru 2021 (TATOLI)-Ministériu Asuntu Parlamentár no Komunikasaun Sosiál (MAPKOMS), kuarta ne’e, halo sorumutu ho Sekretariadu vasina hosi Gabinete Ministériu Solidaridade Sosiál no Inkluzaun hodi diskute kona-ba planu involvimentu mídia iha programa kampaña vasina loron 10 kontra Covid-19 ba Munisípiu 12 no mós RAEOA.
Xefe Gabinete MAPKOMS, Felismina Joaquina Belo, hateten kampaña vasinasaun kontra covid-19 ne’e sei hala’o durante loron 10 nia-laran ne’ebé hahú iha 30 setembru no termina iha outobru 2021.
Notísia Relevante :MAPKOMS relata servisu kampaña vasinasaun kontra COVID-19 ba PM
“Ita persiza involve mídia hotu tanba ita hatene katak mídia nia papél importante atu hamutuk ho membru Governu sira tuun bá baze hodi halo sosializasaun kona-ba vasina kontra Covid-19 nian ba ita-nia komunidade,” Xefe Gabinete hateten ba jornalista sira iha Palásiu Governu.
Objetivu husi programa sosializasaun informasaun ne’e maka motiva komunidade hodi bá simu vasina iha sentru vasinasaun ne’ebé estabelese, nune’e prevene númeru transmisaun surtu covid-19 iha rai-laran.
Nia esplika antes ne’e, Governu involve ona mídia estatál hanesan RTTL,E.P no Tatoli.I.P iha programa kampaña vasinasaun covid-19, maibé ba oin Governu hakarak involve mídia hotu-hotu.
“Enkontru parte loraik ne’e, kada mídia tenke aprezenta ona lista jornalista sira, nune’e ita bele destaka jornalista sira ba kada membru Governu sira hodi tuun bá baze,” nia hateten.
Konsellu Ministru deside ona hodi koloka membru Governu kompostu husi Ministru na’in ida no sekretáriu estadu na’in ida maka sei responsabiliza ba munisípiu ida hodi implementa programa kampaña vasinasaun covid-19.
“Agora kada munisípiu iha membru Governu na’in rua ka hanesan Ministru ida, Sekretáriu Estadu ida ka rua mak sei responsabiliza Munisípiu ida hodi halo kampaña vasina kontra Covid-19 nian ba ita-nia komunidade, tanba ne’e agora kada munisípiu fahe hotu ona membru Governu sira tuun ba halo sosializasaun,” nia esplika.
Entertantu, mídia nasionál sira ne’ebé ohin partisipa iha enkontru ne’e maka RTTL,E.P, Agência TATOLI, Institutu Públiku, Timor-Post, STL, Naunil, Neon Metin no seluk tan.
Notísia Relevante :MS lansa kampaña konjunta vasinasaun COVID-19
Jornalista : Arminda Fonseca
Editór: Agapito dos Santos
