DILI, 29 setembru 2021 (TATOLI)—Ministériu Turizmu Komérsiu no Indústria (MTKI), hanesan ministériu implementadór, asina ona kontratu ho kompañia na’in-lima hodi sosa produtu no distribui Cesta Bázika ba lista pendente.
“Ita iha reklamante 25.569 hosi uma-kain 5.651, nune’e ita kontrata ona empreza na’in-lima, ne’ebé hahú distribui ona Cesta Bázika iha kedan semana kotuk, hanesan iha Comoro, Dili no Ermera,” Ministru Turizmu Komérsiu no Indústria, José Lucas do Carmo da Silva, hateten, iha edifísiu MTKI, Bebora, kuarta ne’e.
MTKI kontrata kompañia, kompostu hosi kompañia rua responsabiliza distribui produtu iha Dili ba reklamante hamutuk 19.000, empreza ida responsabiliza iha munisípiu Ermera, empreza ida toma konta ba parte Leste no empreza seluk toma konta ba parte Aileu no Ainaro.
Notísia relevante: MTKI distribui Cesta Bázika ba reklamante 25.000 semana ne’e
“Empreza sira hahú fahe ona iha semana kotuk iha munisípiu Ermera no Dili. Empreza tolu seluk agora prepara no prontu ona atu distribui iha tempu badak,” nia akresenta.
Tuir Ministru, ideál liu maka empreza sira tenke finaliza distribuisaun iha fulan-setembru nia laran, maibé empreza balun asina kontratu ikus, ne’ebé distribuisaun Cesta Bázika ba reklamante iha outubru nia laran.
Kustu diatribuisaun produtu ba reklamante na’in-25.569 no operasionál hamutuk millaun $1,2.
Nune’e, nia husu empreza distributór sira kontinua kumpre kontratu hodi distribui Cesta Bázika ba kada ema ho valór $25 ba fulan-rua ($50).
“Kompañia ida ne’ebé maka la halo tuir valór iha kontratu ne’e, hatudu inkomprementu ne’ebé bele hetan sansaun hosi Governu,” Ministru afirma.
Molok halo distibuisaun ba lista pendente, progresu distribuisaun Cesta Bázika hosi entidade implementadór sira atinje ona 96,5%, ba populasaun 1.503.563 hosi totál suku 452.
Bazeia ba dekretu-lei númeru 48/2020, 07 outubru, kona-ba medida apoiu família, atribuisaun Cesta Bázika, operadór ekonómika lokál iha ámbitu planu rekuperasaun ekonómika no kria rejime espesiál aprovizionamentu ba efeitu, iha artigu 10 kona-ba modalidade aprovizionamentu, temi katak aprovizionametu ba akizisaun produtu Cesta Bázika realiza bazeia ba modalidade ajudikasaun direta to’o limite verba ne’ebé aloka ba entidade ajudikante ne’ebé ministériu indika ona.
Jornalista : Florêncio Miranda Ximenes
Editora : Julia Chatarina
