DILI, 29 setembru 2021 (TATOLI)–Eis Kolaboradór Xefe Estadu Maiór FALINTIL atuál Deputadu José Agostinho Siqueira “Somotxo” fó klarifikasaun ba públika kona-bá la konsege halo leitura ba biografia saudozu José António da Costa Ma’hunu Bulerek Karathayano tanba tarde.
Notísia Relevante: Somotxo sei uza farda dezmobilizadu halo leitura ba biografia Ma’Huno
Somotxo informa ba públiku tomak hanesan veteranu sira iha Frente Armada, Frente Klandestina no Frente Diplomátika no povu tomak, katak tarde tanba hosi parte Arkivu Muzeu no Rezisténsia Timorense (AMRT) aumenta tán informasaun balun ba biografia ne’e.
“Esplika loloos, ha’u labele esplika maibé tanba iha oráriu ba serimónia ninian, ne’ebé tau ona ha’u-nia naran. Horisehik plenária hotu besik tuku 13:00. Informasaun barak mak tama mai. AMRT bolu ha’u atu aumenta tán informasaun balun kona-bá biografia ne’e mak ha’u bá to’o iha AMRT iha tuku 14:00,” Somotxo ba jornalista sira iha uma fukun, kuarta ne’e.
Nune’e, Eis Ministru Defeza ne’e sai hosi AMRT bá uma atu besik tuku 15.00 ona no tuku 15:17 sai hosi Dili bá Metinaro, entaun to’o Metinaro ne’e tarde.
“Ha’u to’o iha Metinaro tuku 16.10 hanesan ne’e, maibé ha’u bá labele lee ona. Maibé hakarak informa katak ha’u laiha intensaun tanba hanesan públiku hatene katak tempu naruk ha’u la’o hamutuk ho Komandante Ma’Huno. Dezde ha’u iha koléjiu ha’u koñese ona Ma’Huno,” Eis Ministru Defeza ne’e klafirika.
Eis Kolaboradór Xefe Estadu Maiór FALINTIL ne’e koñese Ma’uHuno bainhira Ma’Huno sei ezersítu portugés iha Lospalos tanba militár iha-ne’ebá.
Entaun, nia haktuir, iha momentu ne’ebá ema bolu Ma’Huno nia naran Manecas no fásil ema koñese tanba Ma’Huno ema ida-ne’ebé halo problema beibeik ho malae portugés sira.
“Ne’ebé, ha’u laiha intensaun ruma kona-bá ha’u-nia atrazu ne’e. Atrazu ne’e ida mak engrafamentu entre Dili ba Metinaru. Ha’u to’o duni iha-ne’ebá, maibé arraska atu kumpre desizaun ne’ebé deside ona katak ha’u mak atu lee biografia saudozu nian,” nia dehan.
Somotxo propoin Biografia ne’e tenke halo leitura hosi Brigadeiru ida maibé nu’udar Eis Xefe Estadu Maiór no Sekretáriu Rejiaun nian mak tenke lee biografia ne’e.
Jornalista : Evaristo Soares Martins
Editór : Cancio Ximenes
