OÉ-CUSSE, 29 setembru 2021 (TATOLI)—Vise-Ministru Interiór, Antonio Armindo enkoraja membru Polisia Nasionál Timor-Leste (PNTL) iha RAEOA atu kuda metin dutrina instituisaun nian tuir prinsipiu servisu ho dixipliña, servir no proteger.
“Atu garante estabilidade iha nasaun ne’e, ita-nia dixipliña no ierarkia tau iha prátika ne’e hatudu ita-nia profesionalizmu. Tanba ne’e, ha’u husu nafatin ba membru PNTL sira, hatudu nafatin ita-nia dixipliña ba servisu no atividade ne’ebé ita hala’o. Kuda metin dutrina instituisaun PNTL nian, nune’e servi povu no interese nafatin ba nasaun,” Vice-Ministériu Interiór ne’e hateten iha nia diskursu iha serimónia isár bandeira ne’ebé hala’o iha Kuartel Jerál PNTL Distritál Oé-Cusse, kuarta ne’e.
Governante ne’e informa, Primeiru-Ministru hanesan mós Ministru Interiór hateten iha nia diskursu hand over katak só PNTL mak tenke kuda metin dixipliña ho ierarkia atu servi ba nasaun, kumpre misaun no responsabilidade, proteje no tau intrese Estadu no povu maske ho ekipamentu ne’ebé limitadu.
“Maske ekipamentu menus maibé lahamate imi-nia espiritu atu servi povu iha RAEOA, propteje no kuidadu nafatin soberania tasi, rai-maran no konunidade,” nia dehan.
Governante ne’e husu membru PNTL sira halo servisu ho loloos liuhosi servisu nu’udar Polisia Komutáriu ba Ofisiál Polisia Suku (OPS) sira, tenke halo relasaun di’ak ho líder komunitária no komunidade hodi halo servisu ho profisonál.
Nia informa, foin daudaun PNTL nia rejime salariál aumenta tán 5%, maske lada’uk promulga maibé fiar sei promulga, tanba ida-ne’e’ la’ós retorika maibé halo netik buat ruma no fiar nafatin ba VIII Governu Konstitusionál.
Notísia Relevante: Saláriu F-FDTL no PNTL aumenta 5% no atualiza suplementu remuneratóriu
Jornalista : Abílio Elo Nini
Editór : Cancio Ximenes
