AILEU, 30 setembru 2021 (TATOLI)—Iha suku Saboria, postu administrativu Aileu vila, munisípiu Aileu, ema na’in 199 mak simu ona vasina husi totál populasaun tuir projesaun dadus 2015, hamutuk na’in 902.
Diretór Saúde Munisípiu Aileu, Julio do Santos hateten, suku saboria Postu Adminsitrativu Aileu totál populasaun tuir projesaun dadus 2015 ema hamutuk 902 no vasina ona ema na’in 199.
“Totál populasaun ne’ebé mak iha suku saboria tuir projesaun 2015 husi servisu saúde munisípiu Aileu tuir saúde iha familia hamutuk 902 no ita-nia target (alvu) atu vasina ba ema na’in 544 maibé too ohin loron foin mak vasina ba ema na’in 199. Signifika, ema 300 mak seidauk vasina entaun ita foti prioridade konvida ita-nia superiór sira atu mai haforsa sosializasaun ba komunidade atu nune’e sira rona no hakbesik ba fasilidade saúde atu simu sira-nia vasina,’’ Diretór Saúde Munisípiu Aileu, Julio do Santos ba jornalista TATOLI iha postu saúde Saboria, munisípiu Aileu, ohin.
Husi membru Governu nia sensibiizasaun haforsa tan pesoál saúde nia lian no hein katak aban ba oin ne’e sira ne’ebé mak seidauk vasina bele iha mudansa tanba durante ne’e profisionál saúde nafatin halo promosaun ba sira liuhsui fasilidade saúde , postu saúde no fatin publiku sira maibé iha ne’e pesoál saúde fó informasaun door to door (husi uma ba uma) atu hasa’e informasaun vasina ba komunidade atu nune’e sira hakbesik an ba simu vasina iha fasilidade saúde sira.
Iha fatin hanesan, Ministru Asuntu Parlamentár Komunikasaun Sosiál (MAPKOMS), Francisco Jerónimo hateten, lider komunitáriu mak sai responsavel iha ne’ebé deit, tenki lori povu ba dalan di’ak atu proteje povu hodi labele moris ho moras COVID-19. Hanesan lideransa fó dalan di’ak ba komunidade labele fó-dalan nakukun tanba Saborai atinji ona 25%. Entaun, ida ne’e hakarak aumenta tan persentajen sa’e, mak inan-aman sira tenke simu vasina atu nune’e fila fali ba normál tanba vasina mak últimu rekursu ba ema idaidak nian.
“Dalan hothotu Estadu halo. Tanba ne’e, kona-ba ekonomia ita monu maibé mundu tomak mós ekonomia monu. Entaun, mundu balun normál tanba sira vasina 80% ona entaun ita Timór mós atu hanesan ne’e ita presiza vasina atu nune’e ita la’o fila fali ba dalan normál hanesan uluk.Tanba ne’e, husu lideransa sira fó informasaun ba komunidade. Labele politiza, maibé fó informasaun loos atu nune’e komunidade ba simu vasina,’’ Ministru Asuntu Parlamentar Komunikasaun Sosiál (MAPKOMS) Francisco Jerónimo afirma.
Iha fatin hanesan, Xefi suku Saboria postu adminsitrativu Aileu, João Almedia dehan, iha suku saboria iha aldeia tolu hanesan aldeia Saboria, Bermanuleu, Werulete.
“Esforsu tomak lider komunitáriu halo mak disemina informasaun ba komunidade oinsá halo prevensaun ba an rasik hanesan uza máskara, fase-liman no distánsiamentu sosiál.Tanba ne’e, ami husu komunidade hakbesik an ba fasilidade saúde atu simu vasina,’’ autoridade lokál ne’e informa.
To’o oras ne’e, munisípiu Aileu vasina ona doze dahuluk ba populasaun sira hamutuk rihun 15 resin no doze daruak rihun 15 resin.
Notísia relevante:MAPKOMS enkoraja populasaun Aileu partisipa vasina
Jornalista : Felicidade Ximenes
Editór : Rafy Belo
