DILI, 30 setembru 2021 (TATOLI)—Prezidente Konsellu Ezekutivu Institutu Nasionál Siénsia no Teknolojia (INCT, sigla potugés), José Cornelio Guterres, hateten, institutu hetan envelope fiskál ba tinan 2022 hosi Ministériu Finansa hamutuk $417.000.
“Ita iha tetu fiskál hamutuk $417.000, maibé la sufisiente, tanba ne’e aprezenta tan orsamentu adisionál pur volta $460.000,” Prezidente INCT hateten ba Agência TATOLI, iha ninia knaar fatin, Matadoru, kinta ne’e.
INCT presiza orsamentu adisionál reforsa planu peskiza, konstrusaun edífisiu no sosa viatura.
“Hein Governu no Parlamentu bele deside atu aloka orsamentu millaun $1,6 iha tinan fiskál 2022 atu fasilita INCT aselera planu-sira ne’ebé trasa ona,” nia espera.
Iha sorin seluk, INCT liuhosi péritu internasionál prepara ona rejime legál atubele aproxima nasaun Fransa hodi rejista International Standard Book Number (ISBN) asegura obra akadémiku hosi plajiárizmu ba obra sira no fasil públika peskiza.
Notísia relevante: INCT aproxima Fransa rejista ISBN asegura plajiárizmu obra akadémiku
INCT mós sei sosa software atu ajuda hodi deteta pesoál ruma halo plajiárizmu, maibé sei orienta peskizadór sira atu hakerek obra sira ho lian inglés no portugés tanba lian tetum programa ne’e sei la deteta.
Jornalista : Tomé Amado
Editora : Julia Chatarina
