DILI, 30 setembru 2021 (TATOLI)–Ministériu Ensinu Superiór, Siénsia no Kultura (MESSK) seidauk halo pagamentu indemnizasaun ba komunidade afetadu konstrusaun sidade universitária Aileu tanba hein hela atribuisaun dokumentu legál hosi Ministériu Justisa (MJ).
“Planu atu fó indemnizasaun ba komunidade afetadu iha Aileu, ita hein hela dokumentu hosi Ministériu Justisa, kuandu ita hetan ona atribuisaun sertifikadu rai sidade universitária Aileu hosi Ministériu Justisa, maka ita bele halo ona indemnizasaun ba sira,” Ministru Ensinu Superiór, Siénsia no Kultura, Longuinhos dos Santos, informa iha Palásiu Governu, kinta ne’e.
Notísia relevante: Sidade universitáriu Aileu, millaun $2.1 ba indemnizasaun ho reklamasaun
Governu prevee ona millaun $2,1 ba planu indemnizasaun, maibé kalkulasaun provizóriu hamutuk $1.037.987 ba uma-kain 44 ho totál abitante afetadu 160, nune’e, restu $642.000 sei prepara atu selu reklamasaun komunidade.
Bazeia ba levantamentu dadus, uma-kain 44 sei lakon uma, abitante 58 lakon ai-horis no abitante 102 sei lakon rai.
Tuir Ministru, parte ministériu kontinua husu komunidade sira ne’ebé tama iha lista afetadu atu kumpre rekezitu, hodi loke konta bankária.
“Ha’u haree hotu-hotu kumpre ona rekezitu hosi Ministriu Ensinu Superiór, Siénsia no Kultura no loke ona konta bankaria, nune’e hein de’it kuandu prosesu loos hotu ona bele halo pagamentu,” nia akresenta.
Iha sorin seluk, Xefe suku Fahiria, munisípiu Aileu, Albertu Lou-Teus, hateten, populasaun kumpre ona saida maka Governu husu, maibé to’o agora seidauk iha rezutadu.
“Populasaun sira kumpre ona saida maka Governu husu, maibé to’o agora seidauk iha rezutadu. Kestaun indemnizasaun ne’ebé Ministériu promete tenke realiza, atu nune’e labele hamosu fali polémika entre autoridade ho populasaun sira iha baze,” nia dehan ba Agência TATOLI, via telefónika, ohin.
Kriasaun sidade universitária iha munisípiu Aileu nu’udar komprimísiu VIII Governu Konstitusionál, ne’ebé deskreve iha programa Governu.
Atu minimiza movimentasaun ensinu superiór, hadau malu iha kapitál Dili tanba de’it hakarak kontinua ba universidade, maka Governu iha hanoin atu apoiu joven sira iha ensinu sekundáriu atu konsentra de’it ba sidade universitária ne’e.
Jornalista : Tomé Amado
Editora : Julia Chatarina
