DILI, 30 setembru 2021 (TATOLI)–Governu liuhosi Ministériu Interiór (MI) planeia sei konstrui postu Polísia Nasionál Timor-Leste (PNTL) iha fronteira terrestre hodi redúz pasajen ilegál.
“Informa ba Prezidente Repúblika kona-ba esforsu Ministériu Interiór atu aumenta númeru postu iha fronteira, ne’ebé daudaun iha hamutuk 30-resin no tinan ne’e aumenta ba 25. Ne’e investimentu hosi fundu COVID-19 orsamentu tinan 2021 no kontribuisaun hosi parseiru dezenvolvimentu hosi Austrália. Espera katak ho aumentu númeru postu sira ne’e bele minimiza númeru pasajen ilegál iha fronteira,” Primeiru-Ministru, Taur Matan Ruak, hateten, hafoin reuniaun semanál ho Prezidente Repúblika, Francisco Guterres ‘Lú Olo’, iha Palásiu Prezidensiál, Bairro Pite, kinta ne’e.
Iha hasoru malu ne’e, Xefe Governu relata rezultadu reuniaun despedida ho Embaixadór Indonézia, Sahat Sitorus, kona-ba jestaun fronteira.
Notísia relevante: Embaixadór Indonézia konsidera desizaun destaka F-FDTL hafasil kontrola pasajen ilegál
“Ha’u mós informa kona-ba ha’u-nia enkontru despedida ho Embaixadór Indonézia, ne’ebé ha’u levanta preokupasaun ida-ne’e no iha konversasaun di’ak, nune’e aban bainrua jestaun fronteira ne’e la’ós de’it Timór mak kontrola, maibé parseria ho Indonézia hodi bele halo di’ak liu atu redúz pasajen ilegál sira,” Taur haktuir.
Antes ne’e, Primeiru-Ministru no Ministru Interiór, Taur Matan Ruak, ofisialmente inaugura postu PNTL, Unidade Patrullamentu Fronteira (UPF) iha área Wefauk, postu administrativu Balibo, munisípiu Bobonaro, ne’ebé baliza ho Indonézia.
Notísia relevante: PM Taur inaugura postu UPF iha Bobonaro
Xefe Governu apresia tanba postu ne’e harii hosi kolaborasaun serbisu Governu Austrália no Timor-Leste.
Jornalista : Antónia Gusmão
Editora : Julia Chatarina
