BAUCAU, 30 setembru 2021 (TATOLI)–Prezidente Autoridade Munisípiu (PAM) Baucau, Olívio ‘Bou-Lesa’ Freitas, hateten, sei orienta atu mobiliza tékniku instala iluminasaun tuir estrada atu halo naroman Baucau iha tempu kalan, molok selebrasaun loron Proklamasaun Independénsia ba dala-46 iha loron 28 novembru.
“Iha planu ne’ebé aprovadu ona, hosi lanud área komponente terrestre FALINTIL-Forsa Defeza Timor-Leste (F-FDTL) to’o villa-laran, molok loron 28 novembru ahi tenki lakan ona no konvida na’in ba loja no otél sira loke negósiu to’o kalan, mínimu tuku 22.00,” PAM informa iha Villa-antiga, kinta ne’e.
Bou-Lesa sente haksolok tanba iha loron nasionál ne’e, munisípiu tomak sei konsentra iha Baucau, tanba ne’e preparasaun ba infraestrutura, liuliu lampu tuir estrada tenki naroman iha tempu kalan nune’e fasilita konvidadu halo movimentu.
Notísia relevante: Loron Proklamasaun Independénsia tinan ne’e sei selebra iha Baucau
Tuir Autoridade munisipál ne’e, presiza fasilita mos estabelesimentu komersiál sira, atubele kontinua halo negósiu, mínimu to’o tuku 22:00 kalan.
“Hau sei reuniaun ho parte hotu inklui seguransa bainhira ahi hahú lakan ona,” Bou-Lesa akresenta.
PAM konsidera ho programa mão de obra ne’ebé daudaun ne’e implementa iha Baucau villa, hanesan manutensaun estrada dirasaun rotunda Villa-nova to’o Nagardjo, pinta monumentu-trotoár inklui limpeza jerál, bele hamatak ona Baucau molok selebrasaun loron istóriku ne’e.
Notísia relevante: Baucau villa lansa programa mão de obra
Ba kestaun ne’e, PAM enkoraja Baucau-oan hotu, liuliu joven sira atu labele hafahe malu ba grupu, nune’e bele kria páz no estabilidade molok selebrasaun loron Proklamasaun Independénsia.
“Baucau ema hotu nian no sé de’it mak atu serbisu no halo movimentu livre, labele rai mentalidade a’at tanba ita ema iha limitasaun,” nia fó hanoin.
Antes ne’e, Komisaun Organizadora Nasionál hala’o ona reuniaun ho ekipa munisípiu Baucau ba preparasaun selebrasaun loron Proklamasaun Independénsia, ne’ebé sei realiza iha aldeia Darsula, suku Gariuai, postu Baucau villa, munisípiu Baucau
Jornalista : Natalino Belo
Editora : Julia Chatarina
Agradese tebes ba SR.prezidente autoridade munisipio baukau
👏❤