DILI, 01 outubru 2021 (TATOLI)-Diresaun Nasionál Terras no Propriedade (DNTP) hosi tinan kotuk to’o mai agora simu rejistu foun ba sidadaun hamutuk rihun 5-resin iha territóriu ne’ebé utiliza patrimóniu Estadu nian hanesan rai no uma (uma dinas ne’ebé Indonézia hosik hela), nune’e sei regulariza hodi selu taxa.
“Sidadaun sira ne’e mai rejistu ho voluntáriu no ita sei halo verifikasaun hodi bele regulariza,’’ Sekretáriu Estadu Terras no Propriedade (SETP), Mario Ximenes, hateten ba jornalista iha edifísiu Ministériu Finansa, Aitarak Laran, sesta ne’e.
DNTP iha tinan kotuk loloos halo ona verifikasaun, tanba ho situasaun COVID-19 nune’e labele halo maibé agora laiha ona serka sanitária, sei tun ba terrenu hodi hahú identifikasaun no verifikasaun tuir medida rai ne’ebé iha hodi estabelese kontratu arendamentu.
Polítika oitavu Governu nian liuhosi SETP hala’o ona kampaña informasaun iha territóriu no sei kontinua, atu fó koñesimentu kle’an ba sidadaun hotu ne’ebé uza patrimóniu Estadu atubele rejistu hodi Governu liuhosi Diresaun Nasionál Terras no Propriedade (DNTP) bele administra.
Nune’e liuhosi atividade kampaña iha territóriu maka komunidade hirak ne’e ho voluntária rejistu.
Enkuantu tuir númeru parsela rai ne’ebé antes ne’e Serbisu Nasionál Kadastru (SNC,siglá portugés) halo ona rejistu hamutuk 318.000, ne’ebé entrega ona ba DNTP iha ne’ebé parsela rai 42.000 mak se iha disputa ho ninia klasifikasaun entre rai privadu no privadu (hanesan balun sukat rai liu tiha ida nia baliza ka área) no disputa privadu ho Estadu (hanesan privadu maka sukat fali rai Estadu). Hosi númeru disputa ne’e terras no propriedade foin rezolve to’o 8%.
Tanba ne’e, Ministéiru Justisa (MJ), dadaun iha prosesu ba estabelesimentu Komisaun Terras no Propriedade hanesan organizmu ne’ebé sai responsavel ba rezolusaun kazu disputa rai.
Antes ne’e, Ministru Justisa,Manuel Cárceres da Costa, hateten parsela rai ne’ebé SNC rejista laiha disputa rihun 200 iha tinan oin sei hahú emite sertifikadu na’in ba rai.
Jornalista:Nelson de Sousa
Editór: Rafy Belo
