DILI, 01 outubru 2021 (TATOLI)–Embaixadór Japaun ba Timor-Leste, Masami Kinefuchi, hateten, daudaun ne’e ekipa Japan International Cooperation Agency (JICA), perkorre territóriu Timor-Leste hodi halo planu rekuperaaun ba infraestrutura hirak ne’ebé hetan estragu tanba impaktu inundasaun iha loron 04 abríl.
“Serbisu reabilitasaun ba estragu hirak ne’e sei realiza iha tempu badak. Kompromisu foun ohin loron nian, hanesan adisaun boot seluk hosi Japaun ninia asisténsia durante tinan-ida ho balun ikus ne’e,” Diplomata ne’e dehan liuhosi intervensaun iha ámbitu seremónia asina akordu finansiamentu ba dezenvolvimentu aeroportu internasionál, iha salaun Ministériu Finansa, Aitarak-laran, sesta ne’e.
Notísia relevante: Japaun apoia manta 5.000 ba vítima dezastre naturál
Hodi responde ba dezastre naturál, ba dahuluk Japaun fornese ona manta hamutuk 5.000, nu’udar asisténsia emerjénsia ida inklui asisténsia finanseira millaun $1 ba programa ‘Hamutuk Serví Komunidade’, ne’ebé mak implementa hamutuk ho Banku Dezenvolvimentu Aziátiku (ADB, sigla inglés) no Programa Nasaun Unida ba Dezenvolvimentu (UNDP, sigla inglés).
Antes ne’e, Primeiru-Ministru, Taur Matan Ruak, iha inisiativa husu tulun ba Governu Japaun fó apoiu enjeñeiru Japaun hodi redezeña barrajen ba mota sira.
Notísia relevante: PM Taur atu husu apoiu enjeñeiru Japaun redezeña barrajen mota
Inisiativa ne’e mosu hafoin Xefe Governu hamutuk ho membru Governu tutela ba área infraestrutura no entidade relevante sira halo observasaun ba barrajen sira ne’ebé sustenta mota boot sira iha territóriu laran.
Jornalista : Antónia Gusmão
Editora : Julia Chatarina
